İcra başçıları üçün – Qadağa

Azərbaycanda xeyirxahlığın reklamı son illər dəb halını alıb. Əhalinin kasıb, imkansız təbəqələrinə edilən yardımlar kameralar vasitəsilə lentə alınaraq telekanallarda nümayiş etdirilir. İş adamları, vəzifəli şəxslər xeyriyyəçilik addımlarını kampaniyaçılığa çevirərək şit, bayağı bir formada cəmiyyətə təqdim etməyə meyllidirlər.

Bu cür kampaniyalara Qurban bayramında da rast gəlinir. Onda görürsən ki, rayon rəhbərlərinin əhaliyə qurban paylama səhnələri teleefiri “bəzəyir”. Bir çox saytlar da həmçinin, İH başçılarından aldıqları “reklam” parasıyla bu işə öz “töhfələrini” verirlər. Nəticədə ortaya əcaib və bayağı bir mənzərə çıxır. 

Musavat.com-a hakimiyyətə yaxın mənbələrdən daxil olan məlumatda bu lazımsız ənənəyə son verildiyi deyilir. Mənbənin bilgisinə görə, son aylar Prezident Administrasiyasından rayon icra hakimiyyətləri başçılarına qəti şəkildə tapşırıq verilib ki, əhaliyə olunan yardımlardan kimsə reklam roliki çəkdirib öz təbliğatı üçün istifadə etməsin. Camaata yardım paylansın, qurbanlar kəsilsin, amma bu haqda mediaya xəbər sızdırılmasın, telekanalları rayonlara çağırıb bunu kampaniyaya çevirməsinlər. 

Doğrudan da son Qurban bayramında tv-lərdə bir dənə də olsun bu cür kadrlara rast gəlinməyib. Rayon icra başçıları əvvəlki illərdə olduğu kimi, qurban kəsib imkansız adamlara paylayıblar, lakin reklam roliki çəkdirə bilməyiblər. Dövlətin verdiyi imtiyaz və imkanlardan istifadə edərək öz şit təbliğatlarını qurmaq imkanlarından məhrum ediliblər. 

Mənbədən bu qadağanın səbəbini soruşduqda dəqiq bir cavab verə bilməsə də bəzi təxminlər söylədi. Qaynaq iddia edir ki, bir çox məsələlərdə olduğu kimi, yardımlaşma, əhaliyə əl tutmaq  məsələsinin reklamı, təbliğatı da mərkəzləşdirilib. Bu sahədə də özfəaliyyətə icazə verilmir. Hər şeyin dəmir nəzarətdə saxlandığı bir ölkədə bu qadağanı pozan hansısa məmurun olacağı ağıla batan deyil, olsa da onun özünü qurbanlıq keçiyə döndərib sözün siyasi mənasında “kəsərlər”. 

Mənbə sözügedən qadağa haqda ehtiyatlı da olsa belə bir fikir işlədib. Sitat: “İqtidar xüsusilə də dini bayram və mərasimlərdə ehtiyatlı mövqe tutmaq xəttinə üstünlük verir. Onlar Azərbaycanı maksimum tolerant və sivil müsəlman ölkəsi kimi dünyada tanıtmağa çalışırlar. Sentyabrın 1-dən qüvvəyə minmiş ehsan qadağası da bu planın tərkib hissəsidir. Xüsusilə də son illər müsəlman ölkələrindəki proseslər, radikal İslam amilinin yüksələn xətlə inkişafı fonunda Azərbaycanın mədəni, sivil müsəlman ölkəsi imicinin yaradılması istiqamətində ciddi iş aparırlar. Son aylar Bakıda, Qəbələdə keçirilən beynəlxalq humanitar tədbirlər də bu fəaliyyətin aparıcı istiqamətlərindən biridir”.