Putin Azərbaycanı hədələdi: “Üzv olmayan ölkələrdən miqrant axını məhdudlaşdırılacaq”

Rusiya 2015-ci ildən etibarən Gömrük İttifaqına daxil olmayan ölkələrədən gələn işçi qüvvəsini məhdudlaşdıracaq. Modern.az bildirir ki, bu barədə Rusiya prezidenti Vladimir Putin Ukrayna prezidentin Vladimir Yanukoviçlə birgə keçirdiyi brifinq zamanı bəyan edib. 

“2015-ci ildən etibarən Gömrük İttifaqına üz olmayan ölkələrdən işçi axını ciddi şəkildə məhdudlaşdırlacaq. Biz bu barədə açıq bəyan edirik. İşçi qüvvəsi ilə bağlı bu gün tətbiq olunan güzəştli qaydalar ancaq Gömrük İttifqaına daxil olan ölkələrə şamil olunacaq”-deyə Putin vurğulayıb. 

Putin Ukraynaya da bu İttifaqa qoşulması ilə bağlı çağırış edib. “Sosial-iqtisadi baxımdan mənə elə gəlir ki, Rusiyada, Ukraynada bütün ciddi ekspertlər bu üzvlüyün Ukrayna üçün müsbət proseslərə gətirəcəyini inanırlar”. Putin bildirib ki, məsələ hazırda siyasi müstəvi üzərindədir. “Bu siyasi məsələdir və bu barədə siyasi qərarı Ukrayna verməlidir. Biz istənilən qərara hörmətlə yanaşacağıq”

Rusiya prezidenti bildirib ki, Gömrük İttifaqında məsələlər konsensus yolu ilə həll olunur. “Bu təşkilat istisnasız olaraq bütün tərəflərin maraqları nəzərə alınmaqla qurulub”.

Yanukoviç öz növbəsində bildirib ki, Gömrük İttifaqı ilə bağlı dərhal qərar qəbul etmək olmaz. “Biz yaxşı baa düşürük ki, Gömrük İttifaqının rolunun müəyyən edilməsində Rusiya əsas rolu oynayır. Odur ki, biz hazırda Moskva ilə danışıqlar aparırıq.  Biz Gömrük İttifaqı ilə bağlı sənədlərə baxılmasında maraqlıyıq. Bu İttifaq barədə rəylər müxtəlidir: Onun tərəfdarları və əleyhdarları da var. Hələik daha çox iqtisadi yox, siyasi proses gedir. Gömrük İttifaqı ilə bağlı olan bütün sənədlər ölkə daxilində müzakirə prosedurundan keçməlidir”-deyə Yanukoviç deyib. 

Qeyd edək ki, Azərbaycan Rusiyanın Gömrük ittifqaqına üzvlüklə bağlı təklifini rədd edib. Bu ilin əvvəlində Azərbaycan Dövlət Gömrük Komitəsinin sədri Aydın Əliyev rəsmən bildirib ki, Azərbaycan Avrasiya Gömrük İttifaqına qoşulmayacaq.



Onun sözlərinə görə, ötən il Brüsseldə Dünya Gömrük Təşkilatının iclasında Avrasiya Gömrük Birliyinin gömrük tərəfdaşlığı naziri Azərbaycana da bu quruma qoşulmağı təklif edib., lakin Azərbaycan tərəfi buna cavab olaraq quruma qoşulmayacağını bildirib.

Putinin bu bəyanatı birsıra ciddi detalları ortaya çıxarır. Rusiyada bir milyondan artıq azərbaycanlı miqrant müxtəlif sahələrdə işləyir. Görünür Kreml “miqrant kartı” ilə rəsmi Bakının müqavmətini qıracağını ümid edir. Əgər 2015-ci ildə azərbaycanlı miqrantlara qarşı tətbiq edilən güzəştlər məhdudlaşdırılsa o zaman gərginliyin yaranacağı qaçılmaz olacaq.