“Hərəniz bir saxta alimlik dərəcəsi almısınız...”

“Hərə kartoşkadan bir möhür düzəldərək min hoqqadan çıxıb”









Moderator.az-a Gəncədəki mənbələrimizdən ilginc xəbər daxil olub.



Bildirilir ki, Azərbaycan Müəllimlər İnstitutunun (AMİ) rektoru, deputat Aqiyə Naçıvanlı təhsil naziri Mikayıl Cabbarovun əmriylə AMİ Gəncə Filialının fəaliyyətinin dayandırılmasının ardından Gəncəyə gedərək AMİ Gəncə filialında bir neçə dəfə müəllimlər, tələbələr və valideynlərlə birgə toplantı keçirib.



Həmin toplantıların birində iştirak edən mənbənin bildirdiyinə görə Aqiyə Naxçıvanlı çox əsəbi davranış sərgiləyib və bununla iclasın ovqatını öz xeyrinə dəyişməyə cəhd edərək ona qarşı ehtimal oluna biləcək kəskin çıxışları neytrallaşdırmaq istəyib. Filialda müavin işləyən Sədaqət Adıgözəlova etirazını bildirib ki, bu camaat yazıq oldu və onlar bundan sonra harda və necə işləyib ailələrinə çörək qazancaqlar? Bu fikirdən qəzəblənən deputat rektor bildirib ki, hərəniz bir saxta alimlik dərəcəsi almısınız, sakit yerinizdə oturun və elə etməyin ki, alimlik diplomlarınızı yoxlatdırım. Bu zaman rektor bir maraqlı ifadə də işlədib ki, hərə kartoşkadan bir möhür düzəldərək min hoqqadan çıxıb, mənim bunların heç birindən xəbərim olmayıb. Bu sözdən hiddətlənən bir valideyn qalxıb deyib ki, siz nə danışırsınız, necə olur ki, bu fililada baş verən dəhşətlər barədə bütün respublikanın xəbəri olur, sizin olmur? Necə oldu ki, yeni nazir bir həftənin içərisində xəbər tutdu, gəlib yoxlayıb saxtakarlığı ifşa elədi, amma sizin qulağınızın dibində 10 ildir bu oyunlar gedir, xəbər tutmasınız?



Bir xadimə də durub deyib ki, sizə nə deyək daha, Ramiz kimi (filialın barəsində korrupsiya ittihamları ilə cinayət işi başlanılmış keçmiş direktoru) kişinin başına oyun açdınız, o cür kişini məhv edib indi yanınızda oturan Qazax filialının direktoru Afaq Qasımova kimi adamlarla işləyirsiniz...



Bundan sonra iclasda qarışıqlıq olub və polis müdaxilə etmək və camaatı sakitləşdirmək zorunda qalıb. Bildirilib ki, əlavə təhsil fakultəsi də Gəncə Dövlət Universitetinə köçürüləcək, tələbələrdən də bəziləri GDU-ya, digər tələbələrsə filialllara yerləşdiriləcək.



Maraqlıdır ki, iclasda filialın keçmiş direktoru Ramiz Məmmədov da iştirak və çıxış edib. Məhz o qəzəbli valideynləri sakitləşdirərək hamının filiallarda yerləşdiriləcəyini bildirib. Filialın müəllimlərinin aqibətinə də aydınlıq gətirilib. Bildirilib ki, onlar müsabiqə yolu ilə GDU-ə yerləşdiriləcəklər.



Toplantıda müəllimlər və valideynlərlə indiki direktor Razim Məmmədov arasında da mübahisə olub və aldadılmış valideynləri çətinliklə sakitləşdirmək mümkün olub...



Mövzunu diqqətdə saxlayacağıq və hörmətli Aqiyə xanımın da mövqeyini işıqlandırmağa hazır olduğumuzu bildiririk.