Yazı ölçüsü : 13 Punto

Eyyub Hüseynov: “Məhsulun üzərində qiymətin olmaması qanun pozuntusudur”

Müxtəlif məhsulların satıldığı mağazaların əksəriyyətində malların üzərində qiymətlər yazılmır. Bu da satıcılara, müştərilərə xarici görünüşünə görə fərqli qiymət deməyə şərait yaradır. Bu, geyim, parfümeriya və digər bu kimi məhsulların satıldığı mağazalarda diqqəti daha çox cəlb edir. Azad İstehlakçılar Birliyinin sədri Eyyub Hüseynov Aktual.az-a açıqlamasında bildirib ki, ölkədə satılan malların 80 faizinin heç bir sənədi yoxdur: “Belə hallar ən çox restoranlarda müşahidə olunur. Nazirlər Kabinetinin 94 saylı qərarına əsasən, məhsulların üzərində maddi məsul şəxsin imzası ilə rəsmi qiymət sənədi olmalıdır. “İstehlakçı hüquqlarının müdafiəsi haqqında” Azərbaycan Respublikası qanununun müvaviq tələbinə görə, istehlakçı malın rəsmi qiymət sənədini, o cümlədən, keyfiyyət sertifikatını əldə etmək hüququna malikdir. Təəssüflər olsun ki, Azərbaycanda satılan malların 80 fazinin heç bir sənədi yoxdur. Xüsusən də, qiymət sənədləri. Bu, ticarətdə olan korrupsiya ilə bağlı olan məsələdir. Bu səbəbdən də istehlakçıların hüquqları mükəmməl qorunmur və onların qiymətlərdə aldadılması halları baş verir”. E. Hüseynovun sözlərinə görə, qiymətlərin süni şəkildə şişirdilməsi Azərbaycanın ən bahalı ölkə kimi təqdim olunmasına şərait yaradır: “2011-ci il yanvarın13 -də prezident İlham Əliyev Nazirlər Kabinetinin iclasında ölkədə şişirdilmiş qiymətlərin olduğunu vurğuladı və buna qarşı mübarizə aparılmasını tövsiyə etdi. Ölkə başçısının da buna mövqe bildirməsinə baxmayaraq, bu gün də şişirdilmiş qiymətlərə rast gəlinir. Buna görə də, Azərbaycan yaxın ölkələrlə müqayisədə ən bahalı ölkə kimi təqdim edilir”. Birliyin rəhbəri üzərində qiyməti göstərilməyən məhsul satan mağazaların qanun qarşısında hansı məsuliyyət daşımasından da danışıb: “Şişirdilmiş qiymətlərlə rastlaşan istehlakçı İqtisadiyyat və Sənaye Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinə şikayət edə bilərlər. Əgər satılan məhsulun üzərində qiymət yoxdursa, istehlakçının şikayətinə əsasən aidiyyatı qurum araşdırma apararaq, minimum 500 manat cərimə tətbiq edir və bu hal dəfələrlə təkrarlanarsa, cərimənin miqdarı artır”.

Teqlər:

Bu xəbər cəmi 1610 dəfə oxunuldu