Saakaşvilinin xəbərdarlığı nə dərəcədə ciddidir? – AÇIQLAMALAR

Demokratik İslahatlar Partiyasının sədri, deputat Asim Mollazadə M.Saakaşvilinin son açıqlamasından sonra Azərbaycanın yaxın keçmişini xatırladığını, Milli Məclisin iqtisadi siyasət komitəsinin üzvü Vahid Əhmədov isə belə bir halın baş verəcəyinin inandırıcı olmadığını deyib.



Gürcüstan prezidenti Mixail Saakaşvili Tiflis aeroportunda – “Gürcüstan və Azərbaycan Rusiyadan qaynaqlanan real qeyri-stabillik təhlükəsi ilə üz-üzədir” – fikrini səsləndirib. Qonşu dövlətin başçısı Gürcüstanı əlavə muxtariyyətlər yaradılmaqla daha da parçalanma təhlükəsi ilə üz-üzə durduğunu, Azərbaycanda isə Gürcüstan ssenarisi üzrə dövlət çevrilişi hazırlandığını vurğulayıb: “Rusiyada əslən Gürcüstanın Qardabani rayonundan olan Sadıxov soyadlı bir milyarder çıxıb və Gürcüstanda azərbaycanlılar üçün muxtariyyət əldə etməyə söz verib. Bu cür vədi ölkəmizdəki ermənilərə Gürcüstanın yeni hökuməti tərəfindən əfv edilmiş erməni siyasi fəal Vaaqn Çaxalyan da verib. Sadıxov milyarder Vahid Ələkbərov və başqaları ilə əl-ələ verərək Gürcüstanda baş verənləri Azərbaycanda da həyata keçirmək istəyir və böyük pullar hesabına hakimiyyət dəyişikliyinə nail olmağa hazırlaşır”.



Partiya sədri Asim Mollazadə qeyd edib ki, Azərbaycan “TransAnadolu” qaz kəməri (TANAP) lahiyəsini imzalayandan sonra ölkəyə qarşı artan təziqlər ona Bakı-Tiblis-Ceyhan neft boru kəmərinə dair müqavilənin imzalanmasından sonrakı durumu xatırladır: “O zaman da Azərbaycanda dövlət başçısına sui-qəsd cəhdinin, hansısa hərbi qrupların fəallaşmasının şahidi olduq. Hazırda da Gürcüstana və Azərbaycana müəyyən təziqlər edilir. Bu təziqlər isə əvvəlkilərdən fərqli olaraq yumşaq üst texnalogiyalar vasitəsilə həyata keçirilir. Çox güman ki, Azərbaycanın, Gürcüstan və Türkiyə ilə birgə Avropanın enerji təhlükəsizliyini həyata keçirməsi bir çox qüvvələri narahat edir. Təzyiqlərin digər səbəbi Azərbaycanın regionda oynadığı əhəmiyyəti ilə bağlıdır”.



Asim Mollazadə həmçinin qeyd edib ki, önəmli məsələ dövlət çevrilişi ssenarisində iştirak edəcək şəxslərin, milyardlərin kimliyi deyil, onların arxasında duran qüvvədir: “Adətən, Rusiya öz hərbi sənayə kompleksi sistemini təzyiq vasitəsi kimi istifadə edirdi. Amma bu dəfə Rusiya Federasiyası daha müasir texnologiyalardan istifadə etmək qərarına gəlib”.



Deputat Vahid Əhmədov isə qeyd edib ki, Mixail Saakaşvilinin bölgədə olan proseslərdən yaxşı xəbərdardır və buna görə də belə bir açıqlama ilə çıxış edib: “Saakaşvili faktiki olaraq Azərbaycanı məlumatlandırıb ki, sizin ölkədə də belə hadisə ola bilər. Hazırda regionda baş verən proseslər də görsədir ki, dövlət çevrilişinə cəhdlər mümkündür. Amma mənim fikrimcə, Azərbaycanda belə bir halın baş verməsi inandırıcı görünmür. Çünki Azərbaycanın iqtidarı və müxalifəti lazımi anda Azərbaycanın müstəqilliyi qorumağa hazır olan insanlardan ibarətdir. Mənə gəlir ki, belə ciddi problem bizdə olmayacaq”.