Oğuzda yenidənqurma və təmir işləri aparılıb

Respublikanın enerji təsərrüfatında həyata keçirilən yenidənqurma işləri “Qəbələ” regional elektrik şəbəkəsindən (REŞ) də yan keçməyib. “Azərenerji” ASC-nin Enerji Təchizat İdarəsindən verilən məlumata görə, keyfiyyət göstəricilərinin daha da yaxşılaşdırılması və texniki itkilərin aşağı salınması məqsədilə “Qəbələ REŞ”in balans mənsubiyyətinə daxil olan “Oğuz” EŞ-də də bir sıra yenidənqurma və təmir işləri aparılıb. Son üç ay ərzində aparılan yenidənqurma və təmir-bərpa işləri nəticəsində elektrik verilişi xətləri daha da dayanıqlı iş rejiminə gətirilərək istifadəyə verilib. Müvafiq işlər transformator məntəqələri üzrə də aparılıb. Hazırda elektrik şəbəkəsi normal iş qrafikində fəaliyyət göstərir.



Cari ilin 4 ayı ərzində müəssisənin xidməti ərazisində keçirilmiş reydlər zamanı 8 istehlakçının sayğac uçot komplektində pozuntu faktı aşkar edilərək 61,5 min kilovatsaat itirilmiş elektrik enerjisinin 3,7 min manata yaxın istehlak dəyəri bərpa edilib. Həyata keçirilən müvafiq tədbirlər nəticəsində həmin bu məbləğin 73 faizdən artıq hissəsinin ödənişi təmin edilib. Qalıq məbləğin ödənilməsi istiqamətində isə müvafiq tədbirlər həyata keçirilir.



Onu da diqqətinizə çatydıraq ki, ötən 4 ayı ərzində müəssisənin xidməti ərazisində 21,4 milyon kilovatsaatdan artıq, o cümlədən daimi əhali qrupu tərəfindən isə 4,5 milyon kilovatsaatdan çox elektrik enerjisi istehlak edilib. Nəticədə ötən ilin müvafiq dövrü ilə müqayisədə ümumi istehlak 1,4 milyon kilovatsaata yaxın azalıb. O cümlədən, daimi əhali qrupu üzrə 2013-cü ilin müvafiq dövrü ilə müqayisədə istehlak 622 min kilovatsaatdan çox, ödəniş isə mütləq 9 faizə yaxın artıb.



Aprel ayında müəssisə üzrə 5,3 milyon kilovatsaata yaxın elektrik enerjisi istehlak edilib. Bu da ötən ilin müvafiq dövründəki istehlakla müqayisədə 448 min kilovatsaata yaxın azdır. Ödəniş isə ötən ilin müvafiq dövründəki göstərici ilə müqayisədə mütləq 22 faiz artıb. O cümlədən, daimi əhali istehlakçı qrupunda isə istehlak ötən ilin müvafiq dövrü ilə müqayisədə 197 min kilovatsaatdan çox artaraq 1,1 milyon kilovatsaatdan artıq olub. Ödənişdə mütləq artım isə 7 faizdən çox olub.



Qeyd edək ki, digər enerji obyektlərində olduğu kimi, burada da yanğın təhlükəsizliyi məsələsi daima diqqət mərkəzində saxlanılır. Belə ki, hazırki iqlim şəraitini nəzərə alaraq və yanğın təhlükəsizliyinin təmin edilməsi məqsədilə TM və KTM-lərin ərazisi quru otlardan təmizlənmiş, yanğınsöndürmə postları yoxlanılmış və komplektləşdirilib. Eyni zamanda yağ tutumlu avadanlıqların alt hissəsindəki yağ çınqıllar yeni təmiz çınqıllarla əvəz edilib.