Fövqəladə Hallar Nazirliyi (FHN) I Avropa Yay Olimpiya Oyunları ilə əlaqədar yaradılmış İşçi Qrupun iclası keçirilib. FHN Dövlət Yanğın Nəzarəti Xidmətindən (DYNX) verilən məlumata görə, İşçi Qrupun rəhbəri, FHN-in DYNX rəis müavini, daxili xidmət polkovniki Arzu Əliyevin sədrliyi ilə keçirilən iclasda 2015-ci ildə Bakı şəhərində I Avropa Yay Oyunlarının keçirilməsi ilə əlaqədar tikilməkdə olan və ya hazırda istismar edilən mədəniyyət və turizm obyektlərinin yanğın təhlükəsizlik tələblərinə uyğunluğunun yoxlanılması, aşkar edilmiş nöqsanların vaxtında aradan qaldırılması işinin təşkili və bu sahədə digər mümkün problemlərin operativ həlli ilə əlaqədar qarşıda duran vəzifələr müzakirə olunub.
İclasda müvafiq qurumlara mehmanxana, hotellər, muzeylər, istirahət və əyləncə, idman-sağlamlıq obyektləri və turistlərin ziyarət edəcəyi güman edilən digər mədəniyyət və turizm obyektlərində qanuna müvafiq qaydada yanğın-texniki müayinələr keçirilməsi, yanğın-texniki müayinələr zamanı yanğından mühafizə sistemlərinin təftiş edilməsi, işçi heyətin yanğın təhlükəsizliyi ilə bağlı maarifləndirilməsi, baş verə biləcək yanğın zamanı insanların təxliyə olunması qaydalarının öyrədilməsi və müvafiq təlimlərin keçirilməsi, həmçinin ehtiyat çıxış yollarının və su təchizatının daim işlək vəziyyətdə olmasının təmin edilməsi tapşırılıb.
İşçi qrupun iclasında mehmanxana və hotellərdə, ictimai iaşə müəssisələrində ərazilərin saxlanması, elektrik qurğuları, şəbəkələr və işıqlandırıcılar, yanğınsöndürmə vasitələri, isitmə və havadəyişmə sistemi, kütləvi tədbirlərin keçirilməsi üçün konfrans zalları və digər otaqlarla bağlı yanğın təhlükəsizliyi tədbirləri, yanğın baş verən zaman insanların təhlükəsizliyinin təmin edilməsi, yanğın zamanı hərəkətlər geniş müzakirə obyekti olub və bu istiqamətdə müvafiq tapşırıqlar verilib.
2015-ci ildə I Avropa Yay Olimpiya Oyunlarının Bakı şəhərində keçirilməsi ilə bağlı mədəniyyət və turizm obyektlərinin yanğın və texniki təhlükəsizlik tələblərinə uyğunluğunun yoxlanılması məqsədilə FHN tərəfindən yaradılmış İşçi Qrupun iclasında qarşılıqlı fəaliyyətin təmin olunması məqsədi ilə həmin qrupda nümayəndələrinin də təmsil olunduğu Mədəniyyət və Turizm Nazirliyi ilə birgə keçiriləcək tədbirlər də müzakirə edilib.