Məleykə Abbaszadə: “Ümumtəhsil müəssisələrinin böyük qismində tədris normal aparılmır”

Məktəblərdə verilən aşağı qiymətlər obyektiv, yüksək qiymətlər isə nisbətən şişirdilmiş olur.

Gün.Az-ın məlumatına görə, bunu Tələbə Qəbulu üzrə Dövlət Komissiyasının (TQDK) sədri Məleykə Abbaszadə “Abituriyent” jurnalının 12-ci sayının təqdimatında deyib:



“Tam orta məktəbi bütün fənlərdən “3” qiymətlə başa vuran məzunların 97.47%-nin qəbul imtahanlarındakı nəticələri də çox zəif – 0-200 bal intervalında olub. “5” qiymətlə bitirən məzunların isə yalnız 42.26 faizi attestat qiymətlərini doğrulda bilib. Bu da məktəblərdə verilən aşağı qiymətlərin obyektiv olduğunu, yüksək qiymətlərin isə nisbətən şişirdildiyini göstərir. Buna görə də biz məktəb və qəbul göstəriciləri arasında yüksək korrelyasiya olmayanadək attestat qiymətlərinin qəbulda əlavə bal kimi nəzərə alınmasının tərəfdarı deyilik”.



M.Abbaszadə abituriyentlərin qəbul imtahanlarında zəif nəticə göstərməsini ümumtəhsil müəssisələrinin böyük qismində tədrisin normal aparılmaması ilə əlaqələndirib:



“Abituriyentlərin cavablarının göstəricilərindən aydın olur ki, hər iki bölmədə orta statistik abituriyent fənlər üzrə testlərin yalnız 24-50 faizinə düzgün cavab verib. Test tapşırıqlarının məktəb proqramını tam əhatə etdiyini və qəbul imtahanında iştirak edənlərin məktəbin seçilən şagirdləri olduğunu nəzərə alsaq, belə qənaətə gəlmək olar ki, orta statistik məzun məktəb proqramının 50-76 faizini mənimsəmir. Bu isə ümumtəhsil müəssisələrimizin böyük qismində tədris prosesinin normal aparılmamasından, tələbkarlığın zəifliyindən, ən başlıcası isə, müəllimlərin çoxunun peşəkarlıq səviyyəsinin aşağı olmasından və tədris prosesində yeni təlim üsulları və texnologiyalarından istifadə edə bilməmələrindən irəli gəlir.



Odur ki, bu sahədə həyata keçirilməsi vacib olan digər tədbirlərlə yanaşı, müəllimlərin müasir elmi əsaslarla ixtisasının artırılması, ali təhsil müəssisələrində pedaqoji kadrların hazırlanması səviyyəsinin yüksəldilməsi və gələcək müəllimlərə lazımi pedaqoji-metodiki bilik və bacarıqların aşılanması məsələləri diqqət mərkəzində olmalıdır. Qeyd olunanlarla yanaşı, abituriyentləri yüksək nəticələr qazanan qabaqcıl rayonlarımız, məktəblərimiz, eləcə də öz yüksək nəticələri ilə fərqlənən müəllimlərin qabaqcıl təcrübəsi öyrənilməli və yayılmalıdır”.



TQDK sədri “2013/2014-cü tədris ili üçün abituriyentlərin ali təhsil müəssisələrinə keçirilən qəbul imtahanlarında topladıqları balları da açıqlayıb. Qeyd olunub ki, 2013/2014-cü tədris ili üçün respublikanın ali təhsil müəssisələrinə keçirilən qəbul imtahanlarında 96 min 720 abituriyent iştirak edib. Onlardan 42.98%-i 0-100, 21.99%-i 100-200, 13.84%-i 200-300, 15.65%-i 300-500, 5.55%-i isə 500-700 bal toplayıb.



Ötən il ali təhsil müəssisələrinə keçirilən qəbul imtahanlarında 5364 abituriyent 500-dən yuxarı bal toplayıb. İmtahanlarda 600-dən yuxarı bal toplayan abituriyent isə 1617 nəfər olub. 500-700 arasında bal toplayan abituriyentlərin əksəriyyəti ən nüfuzlu ixtisaslara qəbul olublar. Onlardan ən yüksək nəticə göstərən 102 nəfəri Prezident təqaüdünə layiq görülüb.



600 və ondan yuxarı bal toplayıb qəbul olanların ixtisas qrupları üzrə paylanmasına gəlincə, 22.89%-i (369 nəfəri) I qrupun, 18.67%-i (301 nəfəri) II qrupun, 33.56%-i (541 nəfəri) III qrupun, 24.88%-i (401 nəfəri) IV qrupun abituriyentləridir.