YeniMeydan.info - "Kim qəzetlərin satışını məhdudlaşdırırsa..."

"Kim qəzetlərin satışını məhdudlaşdırırsa..." - İlham Əliyev

Prezident İlham Əliyevə “Jurnalistlərin dostu” mükafatının təqdim edilməsi mərasimi keçirilib

Prezident İlham Əliyevə “Jurnalistlərin dostu” mükafatının təqdim edilməsi mərasimi keçirilib. Mərasimdə Mətbuat Şurasının rəhbərliyi, İdarə Heyətinin üzvləri, ölkənin aparıcı KİV rəhbərləri iştirak ediblər.

“RUH” Jurnalistləri Müdafiə Komitəsinin media nümayəndələri arasında keçirdiyi sorğunun nəticələrinə görə, Azərbaycan Prezdenti İlham Əliyev “Jurnalistlərin dostu” seçilib.

Mətbuat Şurasının sədri Əflatun Amaşov çıxışında sorğunun keçirilmə prinsipləri barədə məlumat verib, ölkə başçısını “Jurnalistlərin dostu” nominasiyasında qalib olduğu üçün təbrik edib. O, Azərbaycan mətbuatının keçdiyi inkişaf yolundan danışıb, bugünkü bəzi problemlərə toxunub.

Azərbaycan prezidenti İlham Əliyev çıxışında ölkədə görülən işlərdən, aparılan islahatlardan danışıb. Ölkə başçısı Azərbaycanda demokratik dəyərlərin, azad söz və medianın mövcud olduğunu qeyd edib. Prezident medianın siyasi qütbləşmədən və xarici dəstəkdən asılı olmaması üçün dövlətin addımlar atmağa hazır olduğunu da bildirib: “Azərbaycanda azad media var. Biz onun daha da inkişaf etməsində maraqlıyıq”.

Prezident Azərbaycan mediasının inkişafı üçün bundan sonra da dövlətin bundan sonra daim diqqət göstərəcəyini bildirib.

Mətbuatla bağlı çıxışlarda səsləndirilmiş problemlərə münasibət bildirən ölkə başçısı Azərbaycanda mediaya qarşı siyasi ayrı-seçkiliyin olmadığını deyib: “Mediaya qarşı heç bir ayrı-seçkilik yoxdur. Ola da bilməz. Qəzet satışı ilə bağlı da heç bir məhdudiyyət yoxdur. Azərbaycanda azad internet məkanı var, bütün ölkə boyu genişzolaqlı internet xətləri çəkilir, insanlar azad şəkildə internetdən istifadə edirlər. Belə olan halda qəzet satışının məhdudlaşdırılmasından söhbət gedə bilməz”.

Azrbaycan prezidenti medianın gənclərin vətənpərvər ruhda yetişməsində, Dağlıq Qarabağ problemi ilə bağlı həqiqətlərin dünyaya çatdırılmasında, ölkənin informasiya blokadasından çıxmasındakı xidmətlərindən də danışıb.

Ölkə başçısı bəzi hallarda Azərbaycana qarşı “qara piar” kampaniyası aparıldığını, medianın bu məsələyə həssas yanaşmasının vacibliyini də vurğulayıb.

Tədbirdə Mətbuat Şurasının üzvləri, media rəhbərləri, qocaman jurnalistlər iştirak ediblər. Bakı Dövlət Universitetinin müəllimi, professor Şirməmməd Hüseynov, millət vəkili Aqil Abbas, “Yeni Müsavat” qəzetinin baş redaktoru Rauf Arifoğlu, qocaman jurnalist Yusif Kərimov, “525-ci qəzet”in baş redaktoru Rəşad Məcid çıxışlarında Azərbaycan prezidentini təbrik edib, medianın inkişafı ilə bağlı fikirlərini söyləyiblər. /APA/

Tədbirdə iştirak edən “Yeni Müsavat” qəzetinin baş redaktoru Rauf Arifoğlunun Musavat.com-a verdiyi məlumata görə, prezident İlham Əliyev bidirib ki, jurnalistlərin dostu seçilmək onun üçün şərəfdir. “Mən dostluğa sadiqəm”, - deyən dövlət başçısı qeyd edib ki, Azərbaycan mətbuatı xarici təsirlərdən azad olmalıdır və dövlət bunun üçün hər şeyi etməyə hazırdır. Prezident iqtidar-müxalifət münasibətlərinin də ölkə daxilində, dialoq yolu ilə həll edilməli olduğunu bildirib.

Rauf Arifoğlu çıxışında Azərbaycan mətbuatının problemlərinə də toxunub, qəzetlərin yayımına yaradılan əngəllərlə bağlı İlham Əliyevə məlumat verib. Dövlət başçısının məsələyə reaksiyası sərt olub. "Kim qəzet satışını məhdudlaşdırırsa, bu, dözülməz haldır", - deyən prezident İlham Əliyev məsələnin həllinə göstəriş verib.

"Yenimeydan.info"nun məlumatına görə, dövlət başçısı deyib: “Ölkəyə yeni köşklərin gətirilməsi ilə bağlı çıxış etmişdim. Köhnə köşklər dəyişdirilməli idi. Lakin mən də şəhərin müəyyən yerlərində olarkən bu köşklərin ətrafının sanki bazara çevrildiyini müşahidə etdim. Maraqlandıqdan sonra məlum oldu ki, bu köşklərdə çox vaxt uyğun olmayan əşyalar satılır. Ciddi şəkildə tapşırıq verdim ki, bu neqativ hallar aradan qaldırılsın. Düşünürəm ki, qəzet satışı üçün heç bir problem ola bilməz. Əgər bu varsa, dərhal aradan qaldırılmalıdır”.

Teqlər:

Bu xəbər cəmi 1845 dəfə oxunuldu