İsraildə Xocalı faciəsinin 21-ci ildönümü ilə bağlı səyyar sənədli fotosərgi öz yürüşünü davam edir

İsrailin mərkəzi şəhərlərdən biri olan Netanyada Xocalı faciəsinin 21-ci ildönümü ilə bağlı səyyar sənədli fotosərgi öz yürüşünü davam edir.

Xocalı soyqırımının 21-ci ildönümünə həsr olunmuş “Xocalıya ədalət” adlı anma mərasimi və sənədli fotosərgi keçirilib.



Fotosərgi bu ilin fevral ayının 25-də Təl-Əviv Universitetinin nəzdində fəaliyyət göstərən Yəhudi Diaspor Muzeyində Heydər Əliyev Fondunun vitse-prezidenti Leyla Əliyevanın rəhbərlik etdiyi “Xocalıya ədalət kampaniyası”nın və “STMEGİ” Dağ Yəhudilərinin Beynəlxalq Təşkilatının dəstəyi, “Azərbaycan–İsrail” Beynəlxalq Assosiasiyasının (Azİz) təşkilatçılığı ilə baş tutub.



Oktyabrın 8-də isə Netanya şəhərində Xocalı qətliamının dəhşətli və qanlı hadisələrini əks etdirən fotosərgi açılıb. Sərginin açılış mərasimində İsraildə akkreditə olunan diplomatik korpusun nümayəndələri, ictimai təşkilatların başçıları, İsrailin mass media nümayəndələri iştirak ediblər.



Fotosərgini açan, “Azərbaycan – İsrail” Beynəlxalq Assosiasiyasının (Azİz) idarə heyətinin üzvü, beynəlxalq münasibətlər üzrə ekspert Arye Qut Dağlıq Qarabağ münaqişəsindən danışıb və fotosərgidə iştirak edən İsrail ictimaiyyətinə Xocalı qətliamına həsr etdiyi prezentasiyanı təqdim edib.



Arye Qut bildirib ki, misli görünməmiş vəhşiliklə törədilmiş Xocalı soyqırımı XX əsrin ən dəhşətli faciələrindən biridir.



“Bu fotosərgidə gördüyünüz sənədli şəkillər, dəhşətli dərəcədə dözülməz səhnələr Azərbaycan xalqının ürəyində sağalmaz bir yara açıb. Azərbaycanın ən qədim yaşayış məntəqələrindən biri – Xocalı şəhəri cəmi bir gecə ərzində yerlə-yeksan edilərək yandırılıb. Bu faciə bütün bəşəriyyətə qarşı törədilmiş cinayətdir. Artıq tarixi faktdır ki, erməni silahlı qüvvələri və muzdlu dəstələri şəhəri və onun ətraflarını tərk etməyə macal tapmamış heç bir xocalılıya aman verməyib”.



A.Qutun sözlərinə görə, dünya bu cinayətin təkcə Azərbaycan xalqına deyil, həm də bütün bəşəriyyətə qarşı yönəldiyini bilməlidir.



“Faktlar təsdiq edir ki, Xocalı şəhərinin mülki əhalisinin düşünülmüş şəkildə qətlə yetirilməsi bu insanlara təkcə azərbaycanlı olduqlarına görə kütləvi divan tutmaq məqsədi daşıyıb. Bu gün Ermənistanda yüksək vəzifə tutan insanlar - Seyran Ohanyan, Serj Sarkisyan, habelə Robert Koçaryan və başqaları baş vermiş soyqırımının günahkarları kimi beynəlxalq məhkəmə qarşısında cavab verməlidirlər. Cinayət cəzasız qalmamalıdır. Dünya ictimaiyyəti hərbi-siyasi təcavüzə görə Ermənistana qarşı ittiham irəli sürməlidir. Beynəlxalq qurumlar, dünya ölkələrinin parlamentləri Ermənistanın Azərbaycan ərazisində törətdiyi Xocalı soyqırımına əsl soyqırımı kimi beynəlxalq hüquqi-siyasi qiymət verməlidir”.



Netanya şəhərinin munisipal, advokat Vaqif Əliyev qeyd edib ki Xocalı qətliamı təkcə Azərbaycan xalqına qarşı deyil, bəşəriyyətə qarşı yönəldilib.



“Xocalı qətliamına həsr edilmiş bu fotosərgi məni sadəcə sarsıtdı. Bu, Azərbaycan xalqına qarşı vəhşilik təzahürüdür. Məhz buna görə də bu sənədli səyyar fotosərgisini il ərzində İsrailin müxtəlif şəhərlərində təşkil edin. Xahiş edirəm sizdən, bu fotosərgini Netanya şəhərinin müxtəlif yerlərində bir neçə ay keçirin. İsrailin siyasi elitası Xocalı qətliamı ilə bağlı məlumatlansın, İsrail ictimaiyyəti və siyasi elita “Justice for Khojaly” kampaniyası çərçivəsində Xocalı qətliamı haqqında dolğun və dəhşətli faktlar haqqında xəbəri olsun”.



Netanya şəhərinin munisipal şurasınn üzvü, “Bizim ev Netanya” təşkilatının sədri Boris Tsirulnik səyyar fotosərgidə gördüyü şəkillərdən sarsıntı keçirdiyini bildirib.