“Mən Ceyhunun anasının üzünə necə baxa bilərəm” - Ombudsman

Dünən Ombudsman Aparatında dövlət orqanlarında ictimaiyyətlə əlaqələr üzrə məsul şəxslərin iştirakı ilə “Informasiya əldə etmək haqqında” qanunun icrasıyla bağlı görülən işlər və qarşıda duran vəzifələrlə bağlı müzakirələr keçirilib. Bəzi çıxışlar maraqlı məqamları ilə diqqət çəkib.



Məlumatlı mənbədən əldə etdiyimiz bilgiyə görə, tədbirdə ilk növbədə Müdafiə Nazirliyinin nümayəndəsinin pafoslu çıxışı qeyri-səmimi qarşılanıb. Həmin nümayəndə yerli mətbuatı ordudakı ölüm hallarını şişirtməkdə, sensasiyalı başlıqlarla təqdim etməkdə suçlayıb. “Lakin bircə dəfə bir qəzet yazmır ki, filan əsgər Azərbaycanın suverenliyi uğrunda həlak oldu” - deyə Müdafiə Nazirliyinin əməkdaşı narazılığını çatdırıb və əlavə edib ki, jurnalistlərin mənəvi-ideoloji yöndə maarifləndirilməsinə ehtiyac var. Orduda ölüm hallarının qabardılmasının həm Silahlı Qüvvələrin nüfuzuna, həm də gənclərin vətənpərvərlik hissinə mənfi təsir göstərdiyini söyləyən nümayəndə ölüm hallarına digər sahələrdə də (nəqliyyat, səhiyyə və s.) rast gəlindiyinə diqqət çəkib.



Ombudsman Elmira Süleymanova ordu ilə bağlı mövzuda jurnalistlərin ehtiyatlı davranmasını tövsiyə etsə də, lakin əsgər ölümlərini digər sahələrdəki ölüm hadisələri ilə müqayisə etməyi düzgün saymayıb. O bildirib ki, cəmiyyət ilk növbədə ordudakı nizamnamədənkənar və ya qeyri-döyüş şəraitində baş verən ölüm hadisələrindən narahatdır və təəssüf ki, bu halların inkişafında artım dinamikası müşahidə olunur. “Mən əsgər Ceyhun Qubadovun ölümünə necə biganə qala bilərəm, onun anasının üzünə necə baxa bilərəm”, - deyə həyəcanını gizlətməyən Ombudsman məhz bu cür ölüm hallarının Azərbaycan Ordusuna başucalılığı gətirmədiyini, eləcə də Ermənistanın bu kimi hadisələrdən məharətlə yararlandığını təəssüflə bildirib. E.Süleymanova əksinə, orduda mənəvi-ideoloji işin gücləndirilməsinə böyük zərurət olduğunu vurğulayıb. O eyni zamanda, fevralın 17-də mərhum Ceyhun Qubadovun 40 mərasiminə qatılacağını, böyük faciə ilə üzləşmiş ailəyə ən azı mənəvi dəstəyini bir daha ifadə edəcəyini də diqqətə çatdırıb.



Tədbirdə daha bir maraqlı məqam yazıçı Əkrəm Əylisli ilə bağlı olub. Azərbaycanın imici və vətənpərvərlik mövzusunun davamı olaraq Ombudsman qeyd edib ki, Ə.Əylislinin məlum kitabı milli maraqlara nə qədər zərbədirsə, yaşlı bir yazıçıya qarşı qeyri-etik davranış və ya onun fiziki cəzalandırılmasına çağırış da bir o qədər zərərlidir. E.Süleymanova hətta televiziya vasitəsilə “qulaqkəsmə” cəzasının ayrıca müzakirəyə çıxarılmasını da əxlaqdan kənar və qeyri-ciddilik adlandırıb. Kitabda təhrif olunmuş faktlara cavab olaraq ortaya elmi-tarixi sübutlar qoymağın daha təsirli olacağını nəzərə çatdıran Ombudsman kitabları yandırmağın da inkvizitor və faşistlərə xas əməl olduğunu vurğulayıb. /Azadlıq qəzeti/