Yardımlıda məktəb direktoru qalmaqalı böyüyür - Direktor müəllimə qarşı

Yardımlı rayonu Məlikli kənd ümumi orta məktəbdə müəllimlər arasında qalmaqal yaşanır. Bu barədə Femida.az -a məlumatı adı çəkilən 9 illik məktəbin dil və ədəbiyyat müəllimi Vaqif Əzizov məlumat verib. Onun sözlərinə görə, məktəbin keçmiş direktoru və hazırda həmin məktəbdə rus dili müəllimi işləyən Kamal Həşimov oğlunu imtahandan kənar məktəbə işə düzəldib. Bu isə onun dərs saatının azalmasına səbəb olub.

“ 2009-cu ildən bu məktəbdə işləyirəm. Dil və ədəbiyyat müəllimiyəm. Məktəbin cəmi 28 nəfər şagirdi var. Ədəbiyyat müəllimi vəzifəsində vakansiya olmaya-olmaya Kamal Həşimov oğlu Ramini bura gətirdi. Halbuki, oğlu işə düzəlmək üçün qəbul imtahanından keçməmişdi. Mənim dərsimdən 11 saat alıb ona verdilər. Etiraz edəndə dedilər ki, xoşum gəlmir, məktəbdən çıxım.”



Müəllim daha sonra bildirib ki, məktəbdə özbaşnalıq bununla bitmir. Cəmi 28 uşaq təhsil almasına baxmayaraq məktəbin 22 nəfər işçisi var. Kitabxana olmaya-olmaya süni vakansiya yardılıb, ora direktor təyin edilib. 



“Məktəbin direktoru vəzifəsi hazırda vakantdır. Direktor vəzifəsini isə müqavilə ilə ibtidai sinif müəllimi Səyyar İbayev icra edir. O isə baş verənlərə müdaxilə edə bilmir.Hətta Yardımlı rayon Təhsil Şöbəsinə dəfələrlə müraciət etsəm də, nəticəsi olmayıb”, deyə müəllim müraciətində bildirib. 



Vaqif Əzizovun bildirdiyinə görə, onun Yeni Azərbaycan Partiyasının üzvü olması Kamal Həşimovda və onun ətrafında olan insanlarda qıcıq yaradır.



“Onlar özləri müxalif fikirli insanlardır. Müxalifət partiyasının üzvləridi. Məni YAP-ın üzvü olduğum üçün qəbul etmirlər.”









Yardımlı rayonu Məlikli kənd ümumi orta məktəbin dil və ədəbiyyat müəllimi Vaqif Əzizovun iddialarına məktəbin direktorundan cavab gəlib. 



Direktor vəzifəsini icra edən Səyyar İbayev Femida.az-a açıqlamasında bildirib ki, müəllimin iddiaları əsassızdır.



“ Vaqif müəllim ixtisası üzrə imtahandan cəmi 21 bal toplamışdı. Bu bala isə yalnız 12-18 saat aralığında dərs vermək olar. Bizim məktəbdə isə dil-ədəbiyyat üzrə 29 saat dərs yükü var idi. Buna görə də əlavə müəllimə ehtiyac yarandı. Yeni işə götürülən müəllim Həşimov Ramin diaqnostik qiymətləndirmədən 49 bal toplayıb. Ona görə də o müəllimi müqavilə əsasında işə götürdük. Bu tam qanuni şəkildə həyata keçirilib.”





Məktəb direktoru digər iddialara da münasibət bildirib. O özünün müxalifət partiyasının yox, YAP-ın üzvü olduğunu bildirib.



“ Vaqif müəllim mətbuata bildirib ki, biz müxalifət partiyasının üzvüyük və guyə onu incidirik. Bu tamamilə yalnış fikirdir. Rəhbər mütləq hakim partiyanın üzvü olmalıdır. Mən də YAP-ın üzvüyəm. Yalan deyir. O özü YAP-ın üzvü deyil. Bu günə kimi belə bir sənədi biz görməmişik. Onun dərs saatı azaldıldığı üçün belə yalan məlumatlar yayır.”