Yazı ölçüsü : 13 Punto

Elmar Məmmədyarov anlaşma memorandumu imzalayıb

Azərbaycanın xarici işlər naziri Elmar Məmmədyarov Banqladeş Xalq Respublikasının xarici işlər naziri Dipu Moninin başçılıq etdiyi nümayəndə heyətini qəbul edib. XİN-in mətbuat xidmətindən “Qafqazinfo”ya verilən məlumata görə, nazir Elmar Məmmədyarov Banqladeş nümayəndə heyətinin səfərini yüksək qiymətləndirmiş və bu səfərin ölkələrimiz arasındakı münasibətlərin inkişafına töhfələr verəcəyinə əminlik ifadə etmişdir. Azərbaycanla Banqladeş arasında siyasi dialoqun yüksək səviyyədə olduğunu vurğulayan nazir Elmar Məmmədyarov, digər sahələrdə də əməkdaşlığın inkişaf etdirilməsinin vacibliyini bildirmişdir. Nazir, həmçinin iki ölkə arasında iqtisadi, enerji, turizm, humanitar, mədəni sahələrdə əməkdaşlıq üçün geniş potensialın olduğunu qeyd etmiş və iqtisadi əməkdaşlığın genişləndirilməsinə zəmin hazırlamaq məqsədilə müqavilə-hüquq bazasının möhkəmləndirilməsini, xüsusilə ikiqat vergitutmanın aradan qaldırılması və investisiyaların qorunması üzrə sazişlərin hazırlanmasının zəruriliyini nəzərə çatdırıb. Banqladeşin xarici işlər naziri xanım Dipu Moni ölkəmizə səfərindən məmnun olduğunu qeyd edərək, Azərbaycanla ikitərəfli əməkdaşlığı genişləndirməkdə maraqlı olduqlarını bildirmişdir. Xanım Dipu Moni hazırda iki ölkə arasında imzalanması nəzərdə tutulan 11 sənədin mətni üzərində iş getdiyini, bunlardan üçünün bu səfər çərçivəsində imzalanacağını diqqətə çatdırdı. O, həmçinin ölkəsinin Azərbaycanla miqrasiya, tikinti və gəmiqayırma sahəsində də əməkdaşlığı inkişaf etdirmək niyyətində olduğunu qeyd edib. Xanım Dipu Moni Ermənistan-Azərbaycan münaqişəsində ölkəmizin ərazi bütövlüyünü və ədalətli mövqeyini hər zaman dəstəklədiklərini bəyan edib. Bu dəstəyə görə rəsmi qonağa təşəkkürünü çatdıran Elmar Məmmədyarov, beynəlxalq təşkilatlar çərçivəsində əməkdaşlığın inkişaf etdirilməsinin vacibliyini diqqətə çatdırıb. Görüşdə tərəflər, həmçinin banqladeşli tələbələrin ölkəmizin ali məktəblərində təhsil alması, ARDNŞ ilə Banqladeş Neft Şirkəti arasında əməkdaşlığın yaradılması ətrafında da fikir mübadiləsi aparılıb. Görüşdən sonra nazirlər hər iki ölkənin xarici işlər nazirlikləri arasında siyasi məsləhətləşmələrə dair anlaşma memorandumunu imzalanıb.

Teqlər:

Bu xəbər cəmi 1400 dəfə oxunuldu