Ukraynanın Azərbaycan üzərindən keçən yük vaqonlarının sayı il ərzində dörd dəfədən çox artıb.
Virtualaz.org-un məlumatına görə, bunu jurnalistlərə "Azərbaycan Dəmir Yolları" QSC-nin sədri Cavid Qurbanov deyib.
Onun sözlərinə görə, bu günədək "Azərbaycan Dəmir Yolları" təqribən 10 milyon ton yük daşıyıb: "Azərbaycanda dəmir yolu ilə yük axını xeyli artıb. Məsələn, əgər ötən il Ukraynadan yük vaqonlarının sayı 460 idisə, bu il artıq iki mindən çoxdur. Biz bu rəqəmi artırmaq və daha çox yük cəlb etmək istəyirik".
C.Qurbanov onu da bildirib ki, Azərbaycanda dəmir yollarının yenilənməsi və tikintisi davam edir: "2016-ci ilin əvvəlindən təxminən 200 kilometr dəmir yolu tikilib. Biz gələn ilin sonuna qədər Bakı-Gəncə sürətli dəmir yolunun tikintisini başa çatdırmağa çalışacağıq".
C.Qurbanov həmçinin qeyd edib ki, "Şimal-Cənub" nəqliyyat dəhlizi çərçivəsində Astarada dəmir yolunun 8,3 kilometrlik hissəsinin tikintisi başa çatdırılıb.