Tikinti şirkəti müştərilərin başına oyun açır - İdeal qalmaqal

“İdeal-İnşaat” MMC-nin dələduzluğuna məruz qalmış Bakı şəhər sakini Fuad Nəzərov iş üzrə uzun müddətdir davam edən məhkəmə prosesindən narazıdır.



Yenimeydan.info  xəbər verir ki,F.Nəzərov “Qafqazinfo”ya müraciət edərək bilidirib ki, Apellyasiya Məhkəməsinin hakimi Məmməd Məmmədov şirkətlə vətəndaşlar arasında olan müqavilələri ləğv edib. O qeyd edib ki, 2011- ci ildə 102 min dollara sözügedən şirkətdən mənzil alıb: “ 2010, 2011 və 2012- ci illərdə daha 11 nəfər şəxs də müxtəlif məbləğlərdə pul ödəyərək şirkətdən mənzil alıblar. Ümumilikdə 12 mənzilin alınmasına 3 milyon 500 min dollar məbləğində pul ödənilib.



Bina Dilarə Əliyeva küçəsində tikilirdi. Biz pulları şirkətin direktoru İsa Məmmədovla görüşdükdən sonra ödəmişik. Əlimizdə pulu ödədiyimizə dair kassa mədaxil orderləri də var. Biz mənzilin açarları gözlədiyimiz halda Nəsimi rayon məhkəməsindən məktub gəldi ki, guya biz 12 nəfər mənzillərin pulunu ödəməmişik. Bu mümkün deyil. Çünki ödədiyimizə dair fakt var.



Məhkəmə sentyabr ayının 11-də keçirdiyi iclasda da bunu təsdiq etdi. Bütün sənədləri məhkəməyə təqdim etdik və onlar da bizim lehimizə qərar çıxardı. Sonra şirkət məhkəmənin qərarından apellyasiya şikayəti verdi. Hələ yanvar ayında şirkətdən başqa mənzil almaq istəyənlərə deyiblər ki, apellyasiya məhkəməsi bizim xeyrimizə qərar verəcək. Onların adlarına olan mənzilləri ləğv edəcəyik və sizə satacağıq”.



Fuad Nəzərov deyib ki, martın 7-də keçirilən məhkəmə iclasında hakim Məmməd Məmmədov 12 nəfərdən 6-nın müqaviləsini ləğv edərək mənzilləri şirkətə qaytarıb: “Bizim 2010-cu il ödədiyimiz məbləğin geri qaytarılmas haqda müqavilə imzalandı. Əvvəl deyirdilər şirkətə pul ödəməmişik, indi isə deyirlər ödədiyiniz pulu qaytarırıq. Biz qərardan kassasiya şikayəti verəcəyik. 2010-cu ildə mən 102 min dollar pul vermişəm, həmin məbləği manata çevirib elə rəsmiləşdiriblər. İndi deyirlər sizə 86 min manat verəcəyik. Mən o vaxt həmin mənzilin kvadratmetrinə 590 manat vermişəm. Mən indi Dilarə Əliyeva küçəsindən 590 manata mənzil ala bilərəm? Ödəmək istəyirlərsə, elə dollarla da ödəsinlər. Manat iki dəfə devalvasiya keçirib, onun dəyəri 2010-cu ildəki dəyərlə eyni deyil. Ya mənzillərimizi özümüzə qaytarsınlar, ya da pulumuzu dollarla ödəsinlər”.



Qeyd edək ki, zərərçəkmişlərdən digər 6 nəfərinin məhkəmə prosesi hələ Nəsimi rayon məhkəməsində davam edir. Xatırladaq ki, sözügedən şirkətlə bağlı dəfələrlə mətbuatda sakinlər adından şikayətlər işıqlandırılıb. Orada bir mənzilin bir neçə adama satılması faktları müəyyən olunub. Şirkətin təsisçisi İsa Məmmədov barəsində həbs qətimkan tədbiri seçilməsinə baxmayaraq o azadlığa buraxılıb. Prezident Administrasiyasının dələduz tikinti şirkətləri ilə bağlı açıqladığı məlumatda da sözügedən şirkətin adı da yer alıb.