Yazı ölçüsü : 13 Punto

FƏHLƏLƏRİN QANINI KİM BATIRIR?

Bu gecə Abşeron rayonu ərazisində ölümlə nəticələnən torpaq uçqunu baş verib. Bədbəxt hadisə Binəqədi-Mehdiabad avtomobil yolunda aparılan qazıntı işləri zamanı yaşanıb. Ehtiyatsızlıq səbəbindən qazıntı sahəsində çalışan iki fəhlənin üstünə torpaq qatı dağılıb və fəhlələrdən biri yerindəcə keçinib. Artıq neçənci dəfədir ki, tikinti şirkətlərində digər müəssisələrdə fəhlələr təhlükəsizlik tədbirlərinin olmaması səbəbindən bədbəxt hadisə ilə üzləşirlər. Şirkət və müəssisələrdə çalışan fəhlələrin təhlükəsizliyinin qənaətbəxş olub-olmaması ilə bağlı FaktXeber.com-a açıqlama verən hüquq müdafiəçisi Mirvari Qəhrəmanlı maraqlı fikirlər səsləndirdi. Müsahib qeyd etdi ki, iş götürənlə fəhlə arasında imzalan əmək müqaviləsinə uyğun olaraq işçinin təhlükəsizliyi tam şəkildə təmin edilməlidir: “Bunların hamısı Əmək Məcəlləsində öz əksini tapır. Baş verə biləcək hər hansı bədbəxt hadisəyə görə işə götürənlər məsuliyyət daşıyır. Eyni halda işçilər də təhlükəsizlik qaydalarına əməl edəcəyi ilə bağlı öz üzərinə öhdəlik götürür. Müvafiq təlimatlarla təlimatlandırılan işçi sənədə imza atır. Digər tərəfdən iş götürənlər işçini lazımı olan bütün avadanlıq və təhlükəsizlik vasitələri ilə təmin etməlidir.” Bədbəxt hadisələrin həm işçilərin, həm də ki, işə götürənlərin məsuliyyətsizliyi üzündən baş verdiyini bildirən Mirvari xanım, “bu günə qədər fəhlələrin ölümü ilə bağlı bir dənə də olsun işə götürən cinayət məsuliyyətinə cəlb edilməyib. Əksər hallarda işçinin və ya fəhlənin qanı batır. Halbuki işçi dünyasını dəyişdikdən sonra onun dəfni təşkil edilməklə yanaşı, ailəsinin ehtiyacları təmin olunmalıdır”, - deyə bildirdi: “Xüsusilə özəl şirkətlərin əksəriyyətində işçilərlə əmək müqaviləsi bağlanmır. Ona görə də bədbəxt hadisələrdən sonra işçinin qanı batır.” Bir il ərzində bədbəxt hadisə nəticəsində dünyasını dəyişən işçilərin sayının 13 nəfər olduğunu bildirən hüquq müdafiəçisi, “ lakin bu göstərici Dövlət Əmək Müfəttişliyinin statistikası ilə düz gəlmir. Onlarda bu göstərici aşağıdır” , - deyə bildirdi. \ faktxeber \

Teqlər:

Bu xəbər cəmi 1380 dəfə oxunuldu