Unun qiymətini 10 manat qaldıran deputatın villası və Allah evi – FOTOLAR

Bir neçə gün öncə deputat Əsabil Qasımovun ailəsinə məxsus olan “Karat” holdinqin istehsal etdiyi un məhsullarını kəskin bahalaşdırdığı və Baş Prokuror yanında Korrupsiyaya Qarşı Mübarizə Baş İdarəsi əməkdaşları tərəfindən əməliyyat keçirdikləri, nəticədə İmişlidə “Karat”da istehsal olunan unun topdansatışı ilə məşğul olan iki böyük anbardan birinin sahibinin tutulması ilə bağlı yerli mətbuatda xəbərlər getdi. Xatırladaq ki, həmin anbarlardan biri Milli Məclisin deputatı Əsabil Qasımovun xalası oğlu Naib Xəlilovun, digəri isə iş adamı Nizami Umudovundur.

Bahalaşmaya əsas səbə isə 20 dekabrda baş verən kəskin devalivasiya göstərilib. “Karat”da istehsal olunan “Karmen” markalı 1 kisə un 18 manat olsa da, hazırda 27 manata satılır.

Avrasiya.net bu hadisədən bir gün öncə xəbər vermişdi ki, Milli Məclisin üzvü Tahir Süleymanova məxsus “Dəvəçi” dəyirmanında istehsal olunan eyni adda 50 kiloluq 1 kisə un 27 manata satılıb. Bu gün isə 27 manat 50 qəpiyə mağazalarda satışa çıxarılıb.

Onu da qeyd edək ki, Azərbaycan qanunlarına görə millət vəkillərinin, dövlət məmurlarının şəxsi bizneslə məşğul olmaları qadağandır. Ancaq ölkə qanunun kağız üzərində olması və çoxlu sayda məmurlarımızın, millət vəkillərimizin bu qanunu tapdalaması isə hər kəsə gün kimi aydındır.

Ə.Qasımov kimi depuat T.Süleymanovun da Şabran və Siyəzən rayonalarında çoxsaylı obyektləri, torpaq sahələri, heyvandarlıq komplekslərinin olduğu həmişə mediada işıqlandırılıb. Amma Tahir Süleymanov heç vaxt bunları boynuna almayıb.

Xatırladaq ki, Tahir Süleymanov əldə etdiyi bütün biznes obyektlərinin, imarətlərinin, torpaq sahələrinin böyük bir hissəsini məhz deputat olduğu müddətdə əldə edib.

Bu gün T.Süleymanovun “Dəvəçi” dəyirmanında istehsal edilən 50 kiloluq 1 kisə unu 9 manat 50 qəpik qaldırmasını heç cürə başa düşmək də olmur. Son hadisələrdən öncə bu qiymət 18 manat təşkil edirdi. Axı prezidentimiz mesaj verib ki, süni qiymət qaldıranlar mütləq cəzalandırılacaq. Bəs niyə yuxarıda adları çəkilən deputatlar bu mesaja əhəmiyyət vermədilər və cəzalanmadılar.

Manatın devalvasiyaya uğramasından sonra əhaliyə belə bir sürprizi bəxş edən T.Süleymanovun əsas məqsədi kapitalını daha da zənginləşdirməkdir. Fürsətdən yararlanmaqla… Elə bu yolla da… Axı onun dəyirmanında taxıl ehtiyatı manatın devalvasiyaya uğramasından çox-çox öncə yığılmışdı…. Heç olmasa T.Süleymanov ona “səs” verən seçicilərinin sosial rifahını düşünüb unun qiymətini birdən-birə 10 manata yaxın qaldırmazdı…

T.Süleymanovun Şabran rayonunda  tikib baş gətirdiyi dəbdəbəli  villasının şəkillərini yenidən diqqətinizə çatdırırıq. Qeyd edək ki, həmin villanın ərazisi 1 ha, qiyməti isə bir neçə milyondan çoxdur. Deputatın villasının bir addımlığında isə məscid yerləşir – Allah evi. Ancaq Allah evi Tahir Süleymanovun villası ilə müqayisədə çox kasıbyanadır və deputat villasının dəbdəbəsinin yanında Allahın evi doğurdan bir komanı xatırladır. Təmirsiz, dağıdılmış, sökülmüş bir məscid…