Deputatların səlahiyyətləri artırıla bilər - Millət vəkillərindən təklif

Hüquq siyasəti və dövlət quruculuğu komitəsinin üzvləri millət vəkillərinin, bütövlükdə Milli Məclisin səlahiyyətlərinin artırılmasını tələb ediblər. “Qafqazinfo” xəbər verir ki, komitənin bu gün keçirilən iclasında deputatlar bunun üçün MM-in Daxili Nizamnəməsinə və "Deputatın statusu haqqında" mövcud qanuna ciddi dəyişikliklərinin edilməsinin vacibliyini dilə gətiriblər.

İclasda çıxış edən millət vəkili, BAXCP sədri Qüdrət Həsənquliyev təkilif edib ki, MM sədrinin müavinlərindən biri parlamentdə təmsil olunun və azlıqda qalan partiyaların nümayəndələrindən biri olsun:

"Bu, dünya təcrübəsində də var. Cənubi Qafqaz regionunda yeganə ölkəyik ki, bizdə belə bir məsələ yoxdur. Yaxşı olardı ki, MM sədrinin müavinlərindən biri azlıqda qalan partiyaların nümayəndələrindən biri olsun. Həmçinin, dünya parlamentlərində büdcəyə nəzarət edən komitənin sədrliyi müxalifət təmsilçisinə təklif olunur və verilir. Bizdə də bu komitənin funksiyasını İqtisadi siyasət komitəsi yerinə yetirir. Bu baxımdan, büdcə ilə bağlı şəffaflığın təmin edilməsi üçün həmin komitənin sədri də müxalifət partiyalarından birinin təmsilçisi olmalıdır. Eyni zamanda, Hesablama Palatasının tərkibinin formalaşdırılmasında parlamentdə olan müxalifət partiyalarının təmsilçiliyinə şərait yaradılmalıdır".

Q. Həsənquliyevin təklifləri onun deputat həmkarı, AVP sədr Fəzail Ağamalı tərəfindən də dəstəklənib:

"Milli Məclisin səlahiyyətlərinin artırılması ilə bağlı ictimai rəy var. Bunu da mətbuat ortaya qoyur. Bəzən mətbuatın üzrərinə gedirik ki, onu niyə belə edir, amma əslində mətbuat ictimai rəy yaradılmasında böyük rol oynayır. Odur ki, ictimai rəyi də əsas götürərək belə hesab edirəm ki, MM-in səlahiyyətlərinin artırılmasına ehtiyac var. Bu gün nazirlər, komitə sədrləri bizdən-xalqın seçdiyi təmsilçilərdən daha geniş səlahiyyətlərə malikdir. Bir dəfə demişəm, indi də deyirəm ki, bəzi nazirlər, komitə sədrləri sanki əlçatmaz olublar. Onlar telefonlara cavab vermirlər. Bəzən parlamentdə də elə bir atmosfer yaradılır ki, sanki nazirlər, komitə sədrləri göydən paraşütlə eniblər. Bu, düzgün deyil. Son hadisələr də göstərdi ki, bəzi nazirlər öz səlahiyyətlərini çox aşıblar və bir sıra qanunsuzluqlara yol veriblər. Həmçinin, MM sədrinin müavinlərindən biri mütləq azlıqda qalan partiyalardan birinin təmsilçisi olmalıdır. Hətta, lazımdırsa, sədr müavinlərinin sayı bir nəfər də artırıla bilər. Bir sözlə, hesab edirəm ki, MM-in, deputatların səlahiyyətlərinin artırılmasına ehtiyac var".