Putinin Ermənistanla bağlı sərəncamına - Azərbaycandan şərh

Ötən gün Vladimir Putin Rusiya və Ermənistan vahid Hava Hücumundan Müdafiə (HHM) sisteminin yaradılması barədə sərəncam imzalayıb. “Qafqazinfo” xəbər verir ki, sərəncamda deyilir ki, Rusiya Federasiya hökumətinin Ermənistan Respublikası ilə Qafqaz regionunda regional Birləşmiş Hava Hücumundan Müdafiə Sisteminin yaradılması barədə təklifi qəbul edilsin.

Ekspertlər və siyasətçilər sözügedən sərəncamı Azərbaycan üçün də təhlükə hesab edirlər. Bildirirlər ki, Dağlıq Qarabağ müharibəsinin başlayacağı təqdirdə, Ermənistanın hava məkanını Rusiyanın qoruması ölkəmiz üçün müsbət hal deyil. 

Məsələ ilə bağlı “Qafqazinfo”ya açıqlama verən millət vəkili Fəzail Ağamalı bunun təhlükəli vəziyyət olduğunu nəzərə çatdırıb: “Rusiya Ermənistanla hərbi əlaqələrini getdikcə gücləndirir. Fikrimcə, müqavilə birbaşa olaraq Azərbaycanla Ermənistan arasındakı münaqişəylə bağlı deyil. Çünki münaqişə Dağlı Qarabağ ətrafında gedir. Biz müharibəni işğal olunmuş torpaqlarımızda aparacağıq. Ermənistan Azərbaycanın digər ərazilərində də müharibə aparmaq həvəsinə düşsə, onda Azərbaycan da yalnız Dağlıq Qarabağda deyil, sərhədboyu müharibə apara bilər. Çünki, birinci Qarabağ müharibəsində müharibə bütün sərhəd boyu gedirdi. Belə olan vəziyyətdə əlbəttə ki, Azərbaycan üçün təhlükəli məqam yarana bilər. Biz Ermənistana müqavimət göstərib əks-hücuma keçsək, bu da imzalanmış olan müqaviləyə əsasən, situasiyanı gərginləşdirə bilər”.

Millət vəkilinin sözlərinə görə, indiki müqavilə təkcə Azərbaycana qarşı yaranmış təhlükə ilə izah olunmalı deyil: “Bu eyni zamanda hazırda Yaxın Şərqdə gedən müharibədə Rusiyanın geniş şəkildə iştirakı ilə bağlıdır. Bu da Amerikanın və onun müttəfiqlərinin vermiş olduğu ciddi reaksiyalarla izah olunmalıdır. Rusiya özünün for postu kimi Ermənistanda hərbi bazasını gücləndirəcək ki, oradan lazım olanda hərbi sığınacaq kimi istifadə edə bilsin. Ermənistan Cənubi Qafqazda yeganə coğrafi mövqeyə malik olan ölkədir ki, oradan Yaxın Şərqə hücum kimi istifadə oluna bilər”.

Hərbi ekspert Üzeyir Cəfərov isə “Qafqazinfo”ya açıqlamasında Rusiyanın növbəti dəfə qeyri-səmimi addım atdığını qeyd edib: “ATƏT-in Minsk qrupunun üzvü olan Rusiyaya bu hal qətiyyən yaraşmazdı. Azərbaycan indiyə qədər bütün sahələrdə Rusiyaya dost və qonşuluq siyasəti sərgiləyib. Amma Rusiya XİN rəhbəri Sergey Lavrovun İrəvənda keçirdiyi mətbuat konfransında səsləndirdiyi fikirlər, o cümlədən Rusiyanın hər zaman Ermənistanın arxasında dayanacağı fikri o deməkdir ki, bundan sonra da heç bir beynəlxalq hüquq və normalara hörmət qoymayan Ermənistana Rusiya işğalçılıq siyasətini davam etdirməkdə bir növ dəstək verməkdə davam edəcək. Təhlükə məsələsinə gəlincə isə, Azərbaycan Ermənistana hər hansı hücum etmək niyyətində deyil. Düşünmürəm ki, Rusiya Azərbaycanın icazəsi olmadan, beynəlxalq güclərə meydan oxuyaraq işğal altında olan ərazilərimizdə Ermənistanı müdafiə etmək üçün hansısa hava hücumundan müdafiə qüvvələri yeritsin. Burada söhbət Ermənistanın hava məkanın müdafiəsindən gedir. Buyursunlar, nə qədər istəyirlərsə, bir-birlərini müdafə etsinlər. Rusiya Azərbaycanın işğal olunmuş ərazilərinin azad etməsinə heç vəchlə mane ola bilməz. Baxmayaraq ki, seperatçı rejimlə bərabər orada Ermənistan qüvvələri də yerləşir, amma onlar orada qeyri-qanuni yerləşirlər. Bəziləri belə düşünür ki, bu saziş Azərbaycanın yürütdüyü xarici siyasətin iflasıdır. Biz qətiyyən belə düşünməli deyilik. Sadəcə, dostumuzun və düşmənimizin kim olduğunu bilib, ona görə addımlar atmalıyıq”