Bakının Nərimanov rayonu, Ağa Nemətulla küçəsi, bina 61-a sakini Əli Nəbiyevin “Azadlıq”a müraciəti əsasında ötən saylarımızda material dərc etmişdik. Prezident Ilham Əliyevə üz tutan Qarabağ müharibəsi əlili, Xocalıdan məcburi köçkün, ehtiyatda olan zabit, eyni zamanda “Xocalı” kiçik müəssisəsinin təsisçisi Əli Nəbiyev eks-prezident Heydər Əliyevin şəhər meri Rəfail Allhverdiyevə tapşırığı əsasında “Xocalı” kiçik müəssisəsi üçün torpaq sahəsi ayrıldığını və bina tikiləcəyini bildirib.
Lakin bina tikintisi baş tutmadığı üçün Ə.Nəbiyev Rusiyadakı tanışlarından borc pul alıb və bu məsələni yarımçıq da olsa reallaşdırıb. 2011-ci ilin sentyabrında isə Nərimanov icra aparatının başçısı ona kirayəyə çıxmağı, binanın isə 2012-ci ilin iyulunda tam tikilib sənədləriylə veriləcəyini deyib. Xocalı sakinini 2012-ci ilin mayında icra aparatına çağıraraq sökülən binaya üç milyon beş yüz min manat ayrıldığını və pulu onların alması üçün vəkalət istəyiblər. Şikayətçi binanı tam qurtarandan sonra sənədləriylə birgə vəkalət verəcəyini qarşı tərəfə söyləyəndən sonra isə icra başçısı kirayə pulunu verməyib və binanı tikib qurtarmayıb. Şikayətçinin bununla bağlı mətbuata açıqlamasından sonra da ona qarşı təzyiqlər başlayıb: “Həştərxanın meri prezidentin başının üstündən keçib adi bir icra başçısının görüşünə gedir. Abdin Fərzəliyev dövlət rəhbərlərinə məhəl qoymur. Üzləşdiyim problemlə bağlı ”Azadlıq” və “Gündəm” qəzetində çıxan yazılardan sonra icra başçısı Naxçıvanın Şərur rayonundan 200 nəfəri Ağa Nemətulla küçəsində “Xocalı” kiçik müəssisəsinə tikilən binanın qapısına yığdı. Onlar məni təhqir etdilər, elektrik və su xəttini kəsdilər, lifti dayandırdılar.
Cənab prezident! Mən vətən üçün 4 il döyüşmüşəm. Bütün qohum-qardaşımı torpaq üstündə itirmişəm. Ermənilər ağzımın içinə güllə atıblar, dişlərimi kəlbətinlə çəkiblər. Erməni cəlladları qollarımı sındırıblar. Atanız Heydər Əliyev bilsəydi ki, mənə etdiyi yaxşılığın sonu belə müşkül olacaq, yəqin “Xocalı” müəssisəsinə bu torpağı ayırmazdı. Şəxsən sizə 10 ərizə, həyat yoldaşınız Mehriban xanıma 5 ərizə, qızınız Leyla xanıma da ərizə yazmışam. Prezident Administrasiyaının rəhbəri Ramiz Mehdiyevə, prezidentin köməkçisi Əli Əsədova 10 ərizə yazaraq qəbulunda da olmuşam. “Qaçqınkom”un rəhbəri Əli Həsənova da ərizələr yazmışam. Lakin Nərimanov rayon icra başçısı sizə və onlara məhəl qoymur. Siz buna nə ad verərsiniz?”
(Azadlıq)