Sabir Rüstəmxanlı Faiq Ələkbərovun ittihamına münasibət bildirib

Artıq dördüncü gündür ki, noyabrın 1-də keçiriləcək parlament seçkilərində iştirak etmək üçün namizədliyi qeydiyyata alınan namizədlərin təbliğat-təşviqat kampaniyasına start verilib. Hətta imza vərəqələrini doldurub dairə seçki komissiyasına təqdim etməyən iştirakçılarla yanaşı, namizədliyi siyasi partiya tərəfindən irəli sürülən və ancaq partiya tərəfindən imzatoplama kampaniyasında iştirakına əngəl törədilən şəxlər də oldu. Belə iştirakçılardan biri namizədliyi Vətəndaş Həmrəyliyi Partiyası tərəfindən 8 saylı Binəqədi 1-ci Seçki Dairəsindən irəli sürən Faiq Ələkbərovdur. F. Ələkbərov partiyanı və rəhbərliyini onu aldadaraq seçkilərdə iştirakdan kənarda saxlamaqda ittiham edir:



“Mənim millət vəkilliyinə namizədliyimi 8 saylı Binəqədi 1-ci Seçki Dairəsindən irəli sürən VHP rəhbərliyi sözünü tutmadı. Bu təklifin təşəbbüsçüsü olan VHP rəhbərliyi, əvvəlcə imzaların 3-4 günə bitəcəyini mənə dəsə də, daha sonra "sizin namizədliyinizin qeydiyyata alınmasına "yuxarıdan" təzyiqlər var" iddiasıyla nə lazım olan imzaları topladı, nə də imza vərəqlərini mənə verdi ki, özüm toplayım. Yəni müxtəlif bəhanələrlə imza vərəqlərim mənə çatdırılmadı, onun üzünü belə görmədim.

Bu anlamda mənim namizədliyimin qeydiyyata alınmamasının əsas səbəbkarı VHP-dir... Əgər VHP hesab edir ki, namizədliyimin qeydiyyata alınmamasına səbəb, mənə dedikləri kimi onlar deyil "yuxarı"dır, buyursun açıqlasınlar... Yəni biz də bilək ki, "yuxarı"dan kim, ya da kimlər mənim namizədliyimin qeydiyyata alınmasını istəməmişdir. Yaxud da, mənim bilmədiyim başqa məqamlar varsa, ona da aydınlıq gətirsinlər...

Ancaq mənim üçün artıq VHP deyilən qurum, özəlliklə bu işdə əsas rol oynayanlar bitmişdir..."



Faiq Ələkbərovun ittihamına münasibət bildirən VHP sədri Sabir Rüstəmxanlı “O, VHP-nin seçki siyahısına da mənim təklifim və xahişimlə salınmışdı” deyərək, bu məslədə bir anlaşılmazlıq olduğunu bildirib:

“Faiq Ələkbərov yazdığı məqalələrin və kitabların ciddi vətəndaşlıq ruhu və elmi - milli dəyəri ilə, insanlıq keyfiyyətləri ilə, qələmiylə apardığı əzmkar mübarizəsi ilə mənə doğma adamdır, hörmət bəslədiyim istedadlı alimlərimizdən biridir. Partiya mənsubiyyəti bir yana, əsil alim üçün bu o qədər də önəmli deyil, amma neçə ildir, biz bir yerdəyik, O, DAK-ın, Azərbaycan Dil Qurumunun milli problemlərimizə həsr olunmuş elmi tədbirlərinin, müzakirələrinin ən fəal iştirakçılarından biridir. O, VHP-nin seçki siyahısına da mənim təklifim və xahişimlə salınmışdı. Arada müəyyən anlaşılmazlıq olsa və bəzi çirkin niyyətli adamlar bundan istifadə edib araya girmək istəsələr də bizim dostluğumuz, əqidədaşlığımız sarsılmazdır. Faiq bəy VHP-dən narazı qalıb fikrini bildiribsə bunu da səmimi və anlaşıqlı qəbul etmək lazımdir. Mən gənclərimizin Faiq bəyin narazılığına səbirsiz yanaşmalarına, onun müəllim fəaliyyətinə kölgə salmağa çalışanların əsassız ittihamlarına qoşulmalarına təəssüfləndim. Əksinə, VHP gəncləri Faiq Ələkbərov kimi sayı o qədər də çox olmayan milli təfəkkürlü alimlərimizi yaxından tanımalı, onun kitablarını oxumalı və ona arxa olmalıdırlar.”