“Qarabağ”lı azarkeşlərdən AzTV rəhbərinə məktub - “Narazıyıq...”

Dünən Avropa Liqasının qrup mərhələsinin ilk turunda “Qarabağ” səfərdə “Tottenhem”ə 1:3 hesabı ilə uduzub. “Qafqazinfo” xəbər verir ki, Ağdam klubunun Londondakı bu oyunu “İdman Azərbaycan” kanalı vasitəsilə canlı yayımlansa da, azarkeşlər bu yayımdan narazı qalıb.

Şəhrçilərin təmsilçimizin qollarına sönük reaksiya vermələri azarkeşləri AZTV-nin sədri Arif Alışanova məktub ünvanlamağa vadar edib. “Qarabağ”ın “İmaret” fan –klubu Alışanova müraciət ünvanlayıb:

Azərbaycan Televiziya və Radio Verilişləri Qapalı Səhmdar Cəmiyyəti" nə açıq məktub !

“Çox hörmətli sədr Arif müəllim, rəhbərlik etdiyiniz kanalın dövlətə məxsus olması Sizin işinizin nə qədər məsuliyyətli və çətin olmasının ilkin göstəricisidir. Bununla yanaşı "İdman" və "Mədəniyyət" bölmələrinin də ayrıca fəaliyyət göstərməsi ölkə ictimaiyyətinin düşüncəsinin formalaşmasına önəmli roy oynadığınızı sübut edir. Sizə məktub yazmağımızın səbəbi "İdman Azərbaycan" TV-də yayımlanan futbol oyunlarını şərh edən aparıcıların qeyri-peşəkarlığı, savadsızlığı və laqeydliyidir. İnkişaf etməkdə olan ölkə idmanını vətəndaşlarımıza nəql edən birinci KİV-in "İdman Azərbaycan" TV olması heç kəsə sirr deyil. Ancaq təəssüf ki, adını belə bilmədiyimiz həmin şərhçilər, nəinki idmana olan həvəsi məhv edir, hətta milyonların onları dinlədiyini unudaraq,insanları kananlı dəyişib, xarici kanaldan matçı izləməyə sövq edir. İdman, futbol terminlərini bilməmək anlamamaqla,onları efirdə yalnış səsləndirməklə yanaşı, lazımsız çıxışlar, matçın gedişatına dəxli olmayan söhbətlər hər futbol yarışında azarkeşləri "İdman Azərbaycan" TV-dən bir az da uzaqlaşdırır. Ötən gün Avroliqanın qrup mərhələsinin ilk matçında səfərdə İngiltərənin "Totenhem" klubu ilə qarşılaşan "Qarabağ"ımızın matçının canlı yayımını şərh edənlər isə sözün əsl mənasında bir fiyasko idi. Belə ki, oyunu TV-dən izləyən azarkeşlər şərhçilərin "Tottenhem" klubuna azarkeşlik etdiyini belə əsaslı olaraq düşünürdülər.Tam əminliklə demək olar ki, bu məktubda yazılanları yüz minlərlə insan təsdiqləyə bilər. Ancaq onların hər biri kanalı dəyişməyi sizə məktub yazmaqdan üstün tutur. Azarkeş qrupumuz nəinki futbolumuzun, eləcə də ölkəmizdə hər sahənin inkişafında maraqlı olan gənclərdən ibarət olduğu üçün Sizə müraciət etmək qərarına gəldik.İnanırıq ki, məktubuzmuz nəticəsiz qalmayacaq və bundan sonra biz öz efirimizdən sevimli komandamızın oyunlarına azarkeşlik edə biləcəyik”.