Aprelin 28-də aksiya olacaq

Yığıncaqda Elşad Musayev (BAP), Yusif Bağırzadə (AMİP), Əvəz Temirxan (ALP), Bəybala Əbil (KXCP), Vaqif Mahmudov (ACP), Əhməd Oruc (Azadlıq Partiyası), Həsən Həsənov (Azad Azərbaycan Partiyası) və Tahir Abbaslı (İslam Demokrat Partiyası), Valeh Mirzəyev (Xalq Azadlıq Partiyası), Qulamhüseyn Əlibəyli (Aydınlar partiyası), Taliyət Əliyev (ADP) iştirak ediblər.

AMİP Qərargahında BAP sədri Elşad Musayevin sədrliyi ilə keçirilən iclasda ölkədəki ictimai-siyasi vəziyyət, qəbul olunmuş qərarların icra vəziyyəti, 28 aprel tarixinə təyin olunmuş mitinqin hazırlıq vəziyyəti, AMİP və İsveçin Moderat Partiyasının təşkilatçılığı ilə “Koalisiyaları və seçki bloklari” mövzusunda keçirilən konfransın nəticələrini, İbrahim İbrahimliyə qarşı baş vermiş zorakılıq hadisələri və eləcə də Rusiyanın Azərbaycanla bağlı separatizm meylləri geniş müzakirə edilib.



Qəbul olunmuş qərarların icra vəziyyəti ilə bağlı fikir mübadiləsi aparan toplantı iştirakçıları keçən dövr ərzində qəbul olunmuş qərarların icrasını qənaətbəxş hesab ediblər. Həmçinin AMİP və İsveçin Moderat Partiyasının təşkilatçılığı ilə “Koalisiyaları və seçki bloklari” mövzusunda Məşvərət Məclisində təmsil olunan siyasi partiyaların rəhbərlərinin iştirakı ilə keçirilən konfrans müsbət qiymətləndirilib və bu kimi tədbirlərin əhəmiyyətli olduğu və davamlı olmasının vacibliyi qeyd olunub.



İclasda həmçinin 28 aprel tarixinə təyin edilmiş kütləvi aksiyaya hazırlıqla bağlı məsələ də geniş müzakirə olunub.



DQMM İbrahim İbrahimliyə qarşı Naxşıvanda baş vermiş hadisəni də geniş müzakirə edib. Baş vermiş hadisəni hakimiyyət qurumlarının özbaşınalığı, insan hüquqlarına, Konstitusiya və digər qanunlara qarşı qəsd kimi qiymətləndirilərək kəskin surətdə pislənilmiş, sabiq millət vəkilinə tətbiq olunan fiziki zorakılığa görə Respublika və yerli hakimiyyət orqanlarının rəhbərlərinin bilavasitə məsuliyyət daşıdığını bildirilib. Baş vermiş hadisənin təşkilatçılarının və icraçılarının dərhal tapılmasını və hakimiyyətin bu məsələyə tez bir vaxtda lazımi aydınlıq gətirməsini tələb edilib.



Qondarma “DQR”-də talış dilində radionun açılması, Moskvada fəaliyyət göstərən “Müstəqil Talışıstan” ictimai birliyinin talış gənclərini Qarabağda yaradılmış hərbi məktəbdə təhsil almağa çağırması, Dağıstanda fəaliyyət göstərən, “Sadval” təşkilatının aktivləşməsinin arxasında Rusiyanın dayandığı qeyd olunaraq kəskin olaraq pislənilib və bu hallar iki qonşu dövlət arasında olan münasibətlərlə bir araya sığmayan hərəkət kimi dəyərləndirilib. DQMM Rusiyanı bu cür hərəkətlərdən çəkinməyə çağırıb.



DQMM həmçinin ötən günlərdə ölkə başçısının ailə üzvlərinin adlarının Virciniya adalarında offşor şirkətlərdə olan maliyyə vəsaitlərində hallandırılması ilə bağlı məsələni də müzakirə edib. Müzakirələrdə ölkə başçısının bu məsələ ilə bağlı ictimaiyyətə ətraflı məlumat verməsi, eyni zamanda ölkənin hüquq-mühafizə orqanlarından bu məsələ ilə bağlı ciddi araşdırma aparması tələb edilib.



Növbəti iclasın 16 aprel tarixində ACP sədri Sülhəddin Əkbərin sədrliyi ilə ACP Qərargahında keçirilməsi haqda da qərar qəbul edilib.