Prezident həkimlərə də xəbərdarlıq etdi

Prezident İlham Əliyev Nazirlər Kabinetinin son iclasında Azərbaycanda dərman biznesi ilə bağlı vəziyyətə bir daha toxunub. Fins.az-ın məlumatına görə, dövlət başçısı yenidən bəyan edib ki, ölkədə dərmanların qiyməti süni şəkildə qaldırılır: “Başqa ölkələrlə müqayisədə Azərbaycanda bəzi dərmanların qiymətləri bir neçə dəfə bahadır. İnsanlar məcbur olub bu dərmanları alırlar”.

“Ən ucuz və keyfiyyətsiz dərmanı gətirib baha satırlar”

Bundan başqa, İlham Əliyevin sözlərinə görə, Azərbaycana dərman idxalı ilə məşğul olanlar ölkəyə keyfiyyətsiz preparatlar gətirirlər və onları yüksək qiymətə satırlar: “Gedirlər ən ucuzunu, ən aşağı keyfiyyətlisini alırlar, gətirirlər, ən baha qiymətə satırlar. Buna son qoyulmalıdır. Hesab edirəm ki, sentyabr ayından gec olmayaraq bu məsələ artıq yeni müstəviyə qalxmalıdır. Həm şəffaflıq təmin ediləcək, hər bir vətəndaş biləcək ki, hansı dərmanı alır və hansı qiymətə alır. Qiymətlərin yuxarı səviyyəsi müəyyən ediləcək. Heç kim o səviyyədən baha sata bilməyəcək. Dərmanları satanların normal gəlir səviyyəsi olmalıdır. Ancaq bu səviyyə 100, 200, 300% olmamalıdır. Heç yerdə belə özbaşınalıq yoxdur. Görülən və görüləcək tədbirlər nəticəsində ilin sonuna qədər dərmanların qiymətləri kəskin şəkildə aşağı düşməlidir”.

“Həkimlər lazım olmayan reseptlər yazırlar”

İlham Əliyev həkimlərə xəbərdarlıq edərək onları pasiyentləri üçün lazımsız reseptlər yazmamağa çağırıb: “Burada həkimlərin də məsuliyyətsizliyi və bəzi hallarda tamahkarlığı özünü göstərir. Lazım olmayan reseptləri yazırlar. Resepti yazır, deyir ki, sən bu dərmanı filan yerdən almalısan. Hətta reseptlə satılmayan vitaminlərə də resept yazırlar. Bu, böyük bir biznes şəbəkəsidir. Bu biznes kimin hesabınadır? Adi insanın hesabına. Adi insan da məcbur olub gedir ona verilən reseptlə dərman alır. Heç bilmir nə alır. Sonra dərmanın ona kömək edib-etməməsi ilə əfsuslar olsun ki, heç kim maraqlanmır”.