YAP-çı deputatdan şok təklif

"ABŞ-ın Milli Demokratiya İnstitutu Azərbaycana və digər fəaliyyət göstərdiyi ölkələrə kütləvi iğtişaşlar, dövlətə qarşı təxribatlar törətmək və pozuculuq fəaliyyəti göstərmək məqsədilə gəlib". “Qafqazinfo” xəbər verir ki, bunu Publika.Az-a açıqlamasında Milli Məclisin Dağlıq Qarabağdan seçilmiş deputatı Elman Məmmədov bildirib.Onun sözlərinə görə, həmin təşkilat Azərbaycanda da dövlət çevrilişi etmək və qarışıqlıq yaratmağa cəhd edənlərə maliyyə dəstəyi verir: "Çox təəssüf ki, bu təşkilat öz planlarını həyata keçirmək üçün Azərbaycanda da adamlar tapa bilir. ABŞ-ın Milli Demokratiya İnstitutu Azərbaycanda bir sıra şəxsləri öz çirkin əməllərinin həyata keçirilməsi işinə cəlb edir. Artıq bu məsələ ilə əlaqədar Azərbaycan dövləti də diplomatik qaydada ABŞ tərəfinə mövqeyini çatdırıb".



Deputat qeyd edib ki, artıq həmin təşkilatın məkrli fəaliyyəti hüquq -mühafizə orqanları tərəfindən aparılan araşdırma nəticəsində təsdiq olunub: "ABŞ-ın bu təşkilatı Azərbaycanda “Nida” Vətəndaş Hərəkatı üzvləri və digər gəncləri maliyələşdirərək ölkədə təxribat və pozuculuq etməklə məşğul olur. Məhz bu məqsədlə də təşkilat "Nida" üzvlərinə və digər gənclərə qanunsuz şəkildə pullar paylayıb, həmin pullar hesabına isə silah və partlayıcı maddələr alınaraq qanuna zid əməllərin həyata keçirilməsi planlaşdırılıb. “Nida” Vətəndaş Hərəkatının həbs olunan üzvləri dağıdıcı xarici təşkilatların təsiri ilə öz sağlam gəncliklərini məhv ediblər. Çox təəssüf olsun ki, ABŞ-ın Milli Demokratiya İnstitutu 20-25 yaşlı bu gəncləri şirnikləşdirərək öz məkrli planlarının həyata keçirilməsi işinə vadar edib. Həmin gənclərin valideynləri öz övladlarının pis yollara düşməsi barədə qəti fikirləşməlidirlər".



E.Məmmədov ABŞ-ın Milli Demokratiya İnstitutu, ATƏT-in Bakı ofisi və Avropa İttifaqına daxil olan bəzi dövlətlərin Azərbaycandakı nümayəndəliklərinin bağlanılmasının vacibliyini vurğulayıb. Onun sözlərinə görə, 10 ildən çoxdur ATƏT-in Bakı ofisi, ABŞ-ın Milli Demokratiya İnstitutu və Avropa İttifaqına daxil olan bəzi dövlətlərin Azərbaycandakı nümayəndəlikləri mütəmadi olaraq Azərbaycan dövlətinin daxili işlərinə qarışmaqla, ölkəmizdə ixtişaş törətməklə, Azərbaycandakı radikal pozucu qüvvələri maliyyələşdirmək və təlimatlandırmaqla məşğul olur: "Bütün bunlara görə hesab edirəm ki, Azərbaycan dövləti öz qanunları çərçivəsində həmin qurumları artıq yerində oturtmalıdır və ölkədən çıxartmağa nail olmalıdır. Həmin qurumlar ya Azərbaycan qanunlarına hörmət edib qalmalı, ya da tədbir görüb ölkədən çıxarılmalıdırlar".