Yazı ölçüsü : 13 Punto

Həkim: “Havanın mülayim keçməsi xəstəliklərin çoxalmasına gətirib”

Son günlər ölkədə, o cümlədən Bakıda xeyli şəxs xəstəlikdən əziyyət çəkir: yüksək hərarət, öskürək, baş ağrısı, halsızlıq, ürək bulanması... Nə baş verir? 5 saylı Birləşmiş Uşaq Yoluxucu Xəstəliklər Xəstəxanasının şöbə müdiri həkim İslam Bayraməliyev “Media forum” saytına açıqlamasında ötən ilin noyabrından başlayaraq infeksion xəstəliklərə tutulanların sayının xeyli artdığını söyləyib: “Bizim xəstəxananın palatasında, demək olar, yer yoxdur. Ən çox yayılan isə yuxarı tənəffüs orqanlarının ağırlaşmış xəstəlikləridir. Hər ay orta hesabla 20 nəfər pnevmoniyaya görə müraciət edib. İnfeksion xəstəliklərin belə çoxalmasına səbəb virus infeksiyasının artmasıdır. Bizdə olan məlumata görə, ən çox xəstəliklər törədən A virusudur”. İslam Bayraməliyev bütün infeksion xəstəliklərin mövsümü xarakter daşıdığını da qeyd edib: “İnfeksion xəstəliklərin ağır forması daha çox 3 yaşa kimi uşaqlarda müşahidə olunur. Cavanlar və orta yaşlı insanlar xəstəlikləri yüngül keçirir. Ancaq ötən illərə nisbətən infeksion xəstəliklərdən əziyyət çəkənlərin sayı çox artıb”. Xəstəliklərin artma səbəbinin havaların anomal keçməsi ilə bağlı olduğunu vurğulayan həkim bu il güclü qar yağmadığına görə xəstəlikləri yaradan virusların sayının artığını da qeyd edib: “Bu qış havanın mülayim keçməsi, ekologiyanın təmiz olmaması xəstəliklərin çoxalmasına gətirib. Virusların aktiv dövründə də uşaqların və orta yaşlı insanların özünü qorumaması virusa yoluxma ehtimalını çoxaldır. Xəstəlik olan yerdə qidalanma zəifləyir. Zəif qidalanan insanlarda immunitet aşağı düşür, onlar qripə daha tez yoluxurlar. Ailənin bir üzvündə qrip infeksiyası baş qaldırırsa, digərlərinin də xəstələnmə ehtimalı çoxalır, ona görə qripə yoluxmuş insanlar qoruyucu maskalardan istifadə etməlidirlər. Qripə tutulmamaq üçün tərkibi vitamin C ilə zəngin qidalar qəbul etmək, meyvə-tərəvəzdən çox istifadə etmək məsləhət görülür. Hətta vitamin C-ni həb formasında da qəbul edib immuniteti artırmaq olar”.

Teqlər:

Bu xəbər cəmi 1460 dəfə oxunuldu