Millət vəkili Vahid Əhmədovun parlamentin 24 fevralda plenar iclasındakı çıxışını sinxron olaraq oxuculara təqdim edir:
"Mən çox təəssüf edirəm ki, bəzi millət vəkilləri ümumiyyətlə makroiqtisadi stabilliyi bilmədən ağızlarına gələni burda danışırlar. Buna çox təəssüf edirəm. Azərbaycanda manatın devalvasiyasına getmək çoxdan vacib və labüd idi. Amma bunun da dünyada qəbul olunmuş yolları var. Bütün MDB məkanında bütün milli valyutaların hamısı dəyərdən düşüb, yalnız Azərbaycan öz milli valyutasını uzun müddət qoruyub saxlaya bildi. Amma manatın devalvasiyasının yumşaq şəkildə həyata keçirilməsi çox vacib idi. Çox təəssüf ki, buna birdən-birə gedildi və nəticədə milli valyuta bir anda 33 faiz dəyərdən düşdü.
Oqtay müəllim, mən iqtisadi siyasət komitəsinin üzvü olaraq mütəmadi şəkildə Mərkəzi Bankın rəhbərliyi ilə əlaqədə olmuşam. Axırıncı iki günə qədər mənə məlumat veriblər ki, Mərkəzi Bank belə bir qərar verəcək, amma milli valyutanın devalvasiyası 85-90 qəpik nəzərdə tutulub. Çox təəssüf ki, Mərkəzi Bank verdiyi sözün üstündə dayanmadı. Bu Mərkəzi Bankın birbaşa səhvidir və bu qurum buna cavabdehdir. Əlbəttə, bu çox ciddi prosesdir və Azərbaycanda insanların müəyyən hissəsinə öz təsirini göstərəcək. O cümlədən belə bir devalvasiya süni qiymət artımına da yol açacaq. Mən bölgələrlə mütəmadi əlaqə saxlayıram, artıq unun da, şəkər tozunun da, digər məhsulların da qiymətində artım müşahidə olunur. Yəni ilkin olkaraq hökumət süni qiymət artımının qarşısını almalıdır. Bunun üçün xüsusi tədbirlər planı işlənib hazırlanmalıdır. İkincisi də insanların banklardakı əmanətləri-depozitləri barədə fikir bildirilməlidir. Yəni Azərbaycan hökuməti depozitlərin qorunması üçün hansı yollara əl atacağını bəyan etməli, bütün imkanlardan istifadə etməlidir. İnsanlar banklardan dollarla kreditlər götürüblər. Xüsusilə milyonlarla vəsait alan sahibkarlar var. Həmin kreditlərin geri qaytarılmasında müəyyən problemlər yarana bilər. Hökumət həmin problemləri həll etməlidir. Amma mən belə hesab edirəm ki, Azərbaycan hökumətinin antiböhran tədbirləri işlənib hazırlanıb və qısa müddətdə həyata keçirilməlidir.”