Hacı Şahindən Qamət Süleymanova cavab

Məşədi Dadaş məscidinin axundu Hacı Şahin “Əbu Bəkr” məscidinin imamı Qamət Süleymanovun Qafqazinfo-ya verdiyi müsahibədə onunla bağlı səsləndirdiyi fikirlərə cavab verib.

Anspress-ə açıqlamasında Hacı Şahin deyib ki, bəzi radikal qüvvələr dəfələrlə ara qarışdırır: “Dəfələrlə mətbuat vasitəsilə radikal cərəyanların bizə qarşı hücum etmələrinin şahidi oluruq. Konkret olaraq mənə qarşı daha çox təzyiqlər olur. Bu da bizim radikal cərəyanlara qarşı tutduğumuz mövqeylə əlaqəlidir. Azərbaycanda ənənəvi məzhəbləri dəstəkləməyimizlə bağlıdır. Azərbaycanda iki tarixən mövcud olmuş əhli-sünnə və şiə məzhəbləri var. Daim bu məzhəblər arasında dostluq-qardaşlıq münasibərləri var. Bizə radikal qüvvələr bu münasibətləri pozmağa çalışırlar.

Bizim Azərbaycan Dövlətçiliyini qorumağa yönəlmiş fəaliyyətimiz bəzi qüvvələri narahat edir. Bu insanların çoxu xaricdən idarə olunur. Onlar Azərbaycanda radikal münasibətləri yaymağa cəhd göstərirlər. Qarşılarında bizim kimi dindarları gördükdə, təbii ki, müxtəlif xoş olmayan əməllərə əl atırlar”.

Hacı Şahin Qamət Süleymanovun müsahibəsində səslənən Kəbə ilə Kərbəlanı müqayisə etmək məsələsinə də münasibət bildirib. O, qeyd edib ki, onun barəsində səslənən fikirlər kökündən yanlışdır. “Qaldı ki, mənim Kəbə ilə Kərbəlanı müqayisə etməyimə, ümumiyyətlə hansısa müqayisə təhqir deyil. Hədislərdə qeyd olunur ki, “alimin qələminin mürəkkəbi, şəhidin tökülən qanından üstündür”. Bu heç də şəhidin alçaldılması demək deyil. Alimin məqamının göstərilməsidir.

“Qurani-Kərim”də qeyd olunur ki, insanların ən üstünü iman gətirmişlərdir. Yəni insandan daha üstünü yaranmayıb. Kəbə və digər ibadətlər də insanın Allaha qovuşmasına yalnız bir vasitədir. Ona görə də, Peyğəmbərimiz buyurur ki, möminin hörməti Kəbədən üstündür.

Kərbəla və Kərbəla müsibəti də kamil insan deməkdir. İmam Hüseyn deməkdir. Heç şübhəsiz ki, kamil insan hər şeydən üstündür. Yəni bu hansısa məzhəbin mövqeyi deyil. Bu “Qurani-Kərim”də deyilənlərdir.

Tutalım ki, əhli-sünnə alimlərindən Malik Mədinənin Kəbədən, Məkkədən üstün olmasını bildirir. Yəni Mədinə Peyğəmbərimizin məzarının olduğu bir yerdir. Təbii ki, ondan üstün heç bir insan yaranmayıb. Lakin bəzi insanlar bu müqayisəni Kəbənin təhqir olunması kimi qələmə verirlər. Lakin bu əsla belə deyil.

Mən özüm də Həcc ziyarətində olmuşam. Həcc karvanına rəhbərlik etmişəm. Həmişə müqəddəs yerlərə hörmətlə yanaşmışam. Əgər Kəbə, Həcc ziyarəti itaətin simvolik formasıdırsa, Kərbəla itaətin canlı nümunəsidir. Yəni Həcc ziyarətində biz qurban kəsib, insanın Allah yolunda dövlətindən keçməsi deməkdir. Kərbəla döyüşündə isə biz bunun canlı nümunəsini görürük. Görürük ki, Kərbəla müsibətində İmam Hüseyn öz doğmalarını Allah yolunda, Haqq yolunda qurban edir. Lakin kimlərsə bu fikri dəyişdirmək, söz oyunu ilə aranı qarışdırmaq istəyirsə bu onların problemidir”.

Hacı Şahin eyni zamanda Qamət Süleymanovun şiə ilahiyyatçılarına qarşı səslənən xoşagəlməz fikirlərə də münasibət bildirib: “Mən hansısa insanları müzakirə etmək istəmirəm. Həmin insanı tanımıram. Bizim kim olduğumuz Azərbaycan cəmiyyətinə bəllidir. Bizim fəaliyyətimiz göz önündədir. Bizim məqsədimiz iki məzhəbin münasibətlərini qorumaq, qardaşılıq və dostluq əlaqələrini qorumaqdır. Bəziləri müxtəlif adlarla bu birliyə xələl gətirmək istəyir. Kimlərəsə böhtan atmaqla insanları çaşdırmaq istəyirlər. Bu zərərli düşüncədir. Bu addımların qarşısı alınmalıdır.

Biz həmişə Azərbaycanda dinlə dövlət arasında münasibətlərin yaxşı olmasına çalışmışıq. Görünür ki, bu da kimlərisə, xarici qüvvələrin adamlarını narahat edir. Bizim müsahibələrdən hansısa fikirləri çıxarıb təhlil edirlər. Bu fikirləri istədikləri kimi təhrif edib, ara qarışdırırlar”.

Sonda Hacı Şahin Qamət Süleymanovun saqqal məsləsinə münasibət bildirərkən “Ateistlər, hətta Konçita da saqqal saxlayır”, deməsinə isə belə şərh verib: “Saqqal saxlamağı hansısa Konçita və başqaları ilə müqayisə edilməsini isə yanlış hesab edirəm”.

Teqlər:

Bu xəbər cəmi 1420 dəfə oxunuldu