NOVRUZ ƏFVİNİN SİYAHISI DƏQİQLƏŞDİRİLİR

Artıq uzun illərdir ki, bayramlar ərəfəsində bir qayda olaraq azadlıqdan məhrum edilmiş şəxslərlə bağlı əfv fərmanı və ya sərəncamı imzalanır. Statistikaya nəzər salsaq, görərik ki, Azərbaycan prezidenti yanında Əfv Məsələləri Komissiyasının yaradıldığı 1995-ci ildən indiyədək 54 əfv fərmanı və ya sərəncamı imzalanıb. 

Bu fərman və sərəncamlar nəticəsində 6 min nəfərə yaxın məhkum cəzasının çəkilməmiş hissəsindən vaxtından əvvəl, minlərlə insan islah işləri, habelə cərimə cəzalarından azad olunub. Sonuncu belə sərəncam ötən il dekabrın 26-da imzalanıb. Həmin sərəncamla 87 nəfər əfv olunub. Onlardan 79 nəfəri bu humanist addım nəticəsində cəzasının çəkilməmiş hissəsindən, 4 nəfər islah işləri cəzasından, 4 nəfər isə cərimə cəzasından azad edilib.

Bəs, önəmli bayramlar ərəfəsində imzalanması bir növ adət halını almış əfv sərəncamı qarşıdan gələn Novruz bayramı ərəfəsində də imzalanacaqmı? Bu sualla müraciət etdiyimiz Hüquq Müdafiə Təşkilatları Monitorinq Qrupunun üzvü Novella Cəfəroğlu bildirdi ki, əfv fərmanı üçün siyahı hazırlanır. Ancaq fərmanın Novruz bayramında, yoxsa may ayında veriləcəyi barədə dəqiq məlumata malik deyil. Çünki bu, birbaşa prezidentin səlahiyyətində olan məsələdir: “Biz dəqiq bilirik ki, əfv üçün siyahı hazırlanır. Həmin siyahı əsasında əfv fərmanı hər halda ya Novruz bayramında, ya da Heydər Əliyevin 90 illiyində - mayın 10-da veriləcək. Çalışacağıq ki, yaxın bir-iki günə dəqiq məlumat öyrənək”. 

N.Cəfəroğlu qeyd etdi ki, təmsil etdiyi Monitorinq Qrupu onların siyahısında olan bütün siyasi məhbusların adını Prezident yanında Əfv Məsələləri Komissiyasına verib: “Biz siyahını Komissiyaya və prezidentə göndərmişik ki, həmin məhbuslar da əfv siyahısına daxil edilsin. Siyahıda dindarlar da, digər tanınmış məhbuslar da var. Ümid edirik ki, onlar azad ediləcək”.

Prezident yanında Əfv Məsələləri Komissiyasının üzvü, Milli Məclisin deputatı Elmira Axundova isə teleqraf.com-a deyib ki, yazda əfv sərəncamının imzalanacağı gözlənilir. Novruz bayramına kimi və ya may ayını gözləməyə dəyər. Deputatın sözlərinə görə, bir müddət sonra Əfv Komissiyası növbəti iclasını keçirəcək. Ancaq o, iclasın konkret vaxtını söyləməyib: “Prezident hər zaman əfv sərəncamı imzalaya bilər. Əfv Məsələləri Komissiyası hər zaman işləyir. Müraciətlər, ərizələr çoxdur. Mən gündə 5-6 ərizə alıram. Bu yaxınlarda komissiyanın iclasında görüşə bilərik. O zaman bütün bu məsələlər müzakirə oluna bilər. Yaz aylarında əfv gözləməyə dəyər. Amma inanıram ki, Novruz bayramına qədər və ya may ayında növbəti əfvetmə olacaq”.