Hansı banklarda kredit şərtləri DAHA AĞIRDIR? - ARAŞDIRMA

Oktyabr ayı daxil olandan bəzi banklar kredit şərtlərini yenidən dəyişməli olublar. Bu vəziyyət kredit üçün müraciət etmək istəyən vətəndaşların da narazılığına səbəb olub. Bəs, bankların kredit şərtləri necədir? Yenimr
Yenimeydan.info  bildirir ki, Bizim.Media bu suala cavab tapmaq üçün araşdırma aparıb.

“Rabitə Bank”

ASC öz müştərilərinə 300 manatdan 30 000 manata qədər nağd istehlak krediti təklif edir. İllik 12 faizdən başlayır və ödəmə müddəti vəsaitin məbləğindən asılı olaraq 3 aydan 48 aya qədərdir. Müraciət zamanı müştəridən şəxsiyyət vəsiqəsi və gəliri təsdiq edən rəsmi sənəd tələb olunur.

10 000 manatlıq kredit götürmək istəyən müştəri isə əgər bu vəsaiti 36 ay müddətinə əldə etmək fikrindədirsə, o zaman illik 12 faizlə hər ay 332,14 manatından keçməli olacaq və müddətin sonunda ödənilən vəsait 11957.04 manata bərabər olacaq. Yəni, müştəri əlavə olaraq, 1197,05 manat artıq ödəməlidir. Diqqətə çatdıraq ki, bu şərtlər əslində “Rabitə Bank”ın müştəriləri üçün təklif etdiyi aylıq şərtlərində biridir və müddəti oktyabrın 13-də başa çatır.

“Yelo Bank”

Bu bankda istehlak kreditinin illik faiz dərəcəsi 11,7 faizdən başlayır. Maksimum məbləğ 300 manat, minimum məbləği isə 50 000 manatdır. Ödəmə müddəti 6-59 ay arasında dəyişir və 3,5 faizlik komissiya haqqı tutulur. Bankdan kredit əldə etmək üçün şəxsiyyət vəsiqəsi və rəsmi iş yerindən arayış, o cümlədən son iş yerində minimum 6 aylıq təcrübə tələb olunur.

Belə ki, əgər müştəri bankdan minimum 5 min manatlıq kredit götürmək istəyirsə, ödəmə müddəti 24 ay olarsa, o zaman illik 11,7 faizlə ayda 234 manat ödəməli olacaq. Yaxud vətəndaşın 10 min manat vəsaitə ehtiyacı varsa, və pulu 24 aylıq götürmək istəyirsə, o zaman illik 11,7 faizlə ayda 469 manat ödəyəcək.

“Kapital Bank”

Burada nağd kreditin illk faiz dərəcəsi 10,9 faizdən başlayır. Kreditin məbləği 30 000 manata qədər, ödəniş müddəti isə 59 manata qədər təşkil edir. Bu vəsaiti əldə etmək üçün tələb olunan ilk şərt belədir ki, krediti “Kapital Bank” və ya digər bankdan əmək haqqı və ya təqaüd alan şəxslər əldə edə bilər. Digər şərtləri isə odur ki, minimal yaş 18 olmalıdır, maksimal yaş isə kreditin son ödəniş tarixinədək 70 yaşı keçməməlidir, eləcə də son iş yerində staj minimum 3 ay olmalıdır. Təqaüdçü müştərilər üzrə isə staj tələbi mövcud deyil. Krediti rəsmi gəliri olan şəxslər əldə edə bilərlər.

“Azərbaycan Beynəlxalq Bankı”

Burada isə kredit götürmək istəyən müştərilər üçün illik 11,9 faiz dərəcəsi ilə ödəmək şərti irəli sürülür. Vəsaitin məbləği, zaminsiz 30 000 manat, zaminlə isə 35 000 manatdır. Ödəmə müddəti isə 60 aya qədərdir. Kredit üzrə komissiya haqqı və sığorta tələb olunmur.

“Unibank”

Bu bankın kredit şərtləri digərlərindən kəskin fərqlənir və illik faiz dərəcəsi çox yüksəkdir. Belə ki, öz müştərilərinə illik 16 faizlə 300 manatdan başlayan kredit vəsaitləri təklif edir, üstəlik 1-5 faiz arasında komissiya haqqı tutur. Kreditin müddəti 60 aya qədər, maksimum məbləği isə 30 000 manatdır. Müştəridən bu vəsaitləri vermək üçün şəxsiyyət vəsiqəsi və gəlirləri təsdiq edən sənəd (iş yerindən əmək haqqı arayışı, elektron arayış, təqaüd haqqında arayış, əmək haqqı və ya təqaüd kartı hesabından son 6 ayın çıxarışı) tələb olunur.

Belə ki, 5000 manatlıq vəsait əldə etmək istəyən müştəri bankın əvvəlcə illik 16 faiz şərti ilə razılaşmağa məcbur olacaq. Əgər kreditin müddəti 60 ay olacaqsa, o zaman ayda 121.59 manat ödəyəcək ki, bu da dövrün sonunda ona 7295.40 manata başa gələcək, yəni müştəri əlavə 2295,40 manat ödəməlidir.

“Bank of Baku”

Öz müştərilərinə illik 11,5 faizlə başlayan kredit təklif edir. Bu kampaniyadan yararlanmaq istəyən müştərilər üçün 50 000 manata qədər vəsait təklif olunur. Kredit müddət isə 3-59 ay arasında dəyişir və komissiya haqqı yoxdur. Müştəridən yalnız şəxsiyyət vəsiqəsi, iş yerindən arayış və ya rəsmi gəlirləri təsdiq edən digər sənədlər (maaş kartı hesabından çıxarış, elektron arayış ) tələb olunur. Bank təkrar müştəriləri üçünsə illik 11,5 fazidən başlayan təkliflər irəli sürür. Bu vəsaitin məbləği maksimum 50 min manat, ödəmə müddəti isə 3-59 ay arasında dəyişir.

Azərbaycan Sənaye Bankı

Bu bankın da kredit şərtləri nəzərəçarpacaq dərəcədə ağırdır. Belə ki, kredit üçün müraciət edən şəxslər götürəcəyi vəsaitin həcmindən asılı olmayaraq, illik minimum 13 faiz, maksimum 19 faizlə razılaşmalı olacaq. Məbləği isə 500 manatdan 30 000 manata qədərdir. Əgər müştəri yenidirsə, zaminlə 1-12 ay arasında illik 14%, 13-36 ay arasında isə 15% ilə ödəyəcək. Zaminsiz müraciət edirsə, o zaman 1-12 ay üçün 16%, 13 -36 ay üçünsə 17% ilə ödəyəcək.