Söyüş üstündə sahibkarın qulağını dişləyərək qoparan şəxslə bağlı QƏRAR

 
Bakı Apellyasiya Məhkəməsində qəsdən sağlamlığa ağır zərər vurmada təqsirləndirilən Amil Hacızadənin (adı, soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim İbrahim İbrahimlinin sədrliyi ilə keçirilən prosesdə qərar elan olunub.
Qərara əsasən, onun apellyasiya şikayəti təmin edilməyib.
İttihama görə, hadisə 06 oktyabr 2024-cü il tarixdə, saat 23 radələrində Bakı şəhəri Suraxanı rayonu, Bəhruz Kəngərli küçəsində yerləşən “Həsənoğlu market”in qarşısında qeydə alınıb.
Belə ki, Amil Hacızadə həmin mağazanın sahibi olan qonşusu, zərərçəkmiş Zamiq Əsədovla (adı, soyadı şərtidir) aralarında yaranmış münaqişə zamanı qəsdən ona xəsarətlər yetirib.
Belə ki, təqsirləndirilən şəxs idarə etdiyi “VAZ-2104” markalı avtomobillə mağazanın qarşısından keçərkən zərərçəkmiş şəxsin söyüş söyməsini eşidib. Bu səbəbilə tərəflər arasında mübahisə yaranıb, münaqişə gərginləşdiyi zaman Amil Zamiqin sol qulaq nahiyəsini dişləyərək onun sol qulaq seyvanının yuxarı kənarında travmatik qopma (defekt) ilə müşayiət olunan əzilmiş-cırılmış yara yetirib.
Bundan sonra təqsirləndirilən şəxs müəyyən edilməyən dəmir predmetlə zərərçəkmiş şəxsin bədəninin müxtəlif nahiyələrinə bir neçə zərbə endirərək ona xəsarət yetirib.
Hadisədən sonra Amil Hacızadə saxlanılaraq cinayət məsuliyyətinə cəlb edilib.
Bakı Ağır Cinayətlər Məhkəməsinin hökmü təqsirləndirilən şəxs 3 il 5 ay 29 gün müddətə azadlıqdan məhrum edilib və o, məhkəmə iclas zalından dərhal həbsə alınıb.