Putinin adamından Paşinyana sərt XƏBƏRDARLIQ – Zəngəzur vaqiəsi

   Dövlət Dumasının MDB İşləri Komitəsinin sədr müavini Konstantin Zatulin hesab edir ki, Ermənistanın Baş naziri Nikol Paşinyan üçün Rusiyanın Ermənistandan Azərbaycan və Türkiyə sərhədlərinə qədər dəmir yolu hissələrinin yenidən qurulmasında iştirak etməsi vacibdir.
Tribuna.az yazır ki, bu haqda, ermənipərəst, lakin Ermənistana girişi qadağan olunan Zatulin özü danışıb. Onun sözlərinə görə, bu hissələr daha sonra “Tramp marşrutu”na qoşulacaq:” Beləliklə, tənqid olunarsa, oxlar Rusiyaya qarşı yönələ bilər”.
Yada salaq ki, Ermənistan Rusiyaya müraciət edərək, Ermənistandan Azərbaycan və Türkiyə sərhədlərinə qədər dəmir yolu hissələrinin bərpası üçün müraciət edib. Bu barədə ölkənin Baş naziri Nikol Paşinyan yanvarın 15-də bildirib. Onun sözlərinə görə, o, artıq bu məsələni Rusiya Prezidenti Vladimir Putinlə, eləcə də iki ölkənin hökumətləri səviyyəsində müzakirə edib.
Zatulin isə deyib ki, ABŞ ilə Ermənistan arasında qismən dərc olunmuş müqavilələr göstərir ki, həmin dəhlizdən tranzitdən mənfəət əldə edən şirkətin 76 faizi ABŞ-a, 24 faizi isə Ermənistana məxsus olacaq.
“Başqa heç kim bu işdə iştirak edə bilməz. Rusiya bəzi funksiyalarda iştirak edə bilər, lakin həmin şirkətin təsisçiləri və ya səhmdarları arasında ola bilməz. Bundan sonra Paşinyan Rusiyanın maraqlarını görməzdən gəlməsi ilə bağlı tənqidləri yayındırmaq üçün bir jest etmək istədi”, – deyə deputat vurğulayıb.
Zatulin xəbərdarlıq edib ki, Ermənistan “oxlarını Rusiyaya tuşlamaq” istəyir: “O, Moskvanın maraqları ilə maraqlanmır.
Söhbət Azərbaycan və Türkiyəyə bitişik ərazilərdən gedir. Paşinyan Rusiyanı bu işə cəlb etmək istəyir ki, sonradan hər yerdə Rusiyanın iştirak etdiyini iddia edə bilsin. Kobud desək, oxları Rusiyaya tuşlamaq istəyir. Bu, əvvəlcə Qarabağa dəvət olunmuş, lakin sonradan onun iştirakı praktik olaraq nəzərə alınmayan sülhməramlı kontingentimizlə baş verənlərlə təxminən eynidir. Sadəcə başa düşməliyik ki, Paşinyan bizim maraqlarımıza uyğun hərəkət etmir. O, Qərblə müttəfiqliyə və dostluğa pul qoyur. Gizli bir gündəmin olmadığından əmin olmaq üçün onun təklifləri dəfələrlə təhlil edilməlidir”.
Həsən Ağa