Minatəmizləmə Agentliyi 3702 ədəd təkər alır: 631 min manata

     Dövlət Minatəmizləmə Agentlliyi (ANAMA) maraqlı tender keçirib. Tribuna.az xəbər verir ki, sözügedən qurum istifadəsində olan avtomobillərə təkərlər alacaq.
Bildirilir ki, “R.A.F.-AVTO” MMC ilə əldə olunmuş razılaşmaya əsasən Agentlik 3702 ədəd müxtəlif ölçülü təkər alacaq.  Həmin malların alınmasına görə isə şirkətə 631 min 99 manat pul ödəniləcək.

Hər avtomobilin 4 ədəd təkər istifadə etdiyini nəzərə alsaq, belə başa düşlər ki, ANAMA-nın balansında 925 ədəd avtomobil var. Üstəlik, bu avtomobillərin hamısının təkərləri eyni vaxtda sıradan çıxıb.
 
Qeyd edək ki, ANAMA-nın rəsmi saytında balansında nə qədər avtomobil olması barədə məlumat yoxdur. Lakin onların sayının 925 ədəd olacağı da inandırıcı deyil.

Ümid edək ki,  Agentliyin bununla bağlı məntqili və əsaslı açıqlaması olacaq. Qarşı tərəfin də mövqeyini dərc etməyə hazırıq.

Fərda Uğur