28 dekabr 2024
10
Təyyarə yerə 100 metr qalmış… – Bu detallar ilk dəfə açıldı
Dekabrın 25-də Azərbaycan Hava Yollarına məxsus təyyarə Tüpkaraqan rayonu ərazisində, Saina Şapaqatova kəndi yaxınlığında faciəvi qəzaya uğrayıb. Mangistau Regional Elektrik Şəbəkəsi Şirkətinin əməkdaşları hadisə yerinə ilk gələnlər arasında olub, onlar dərhal sərnişinlərə kömək etməyə tələsiblər.
Yenimeydan.info Axar.az-a istinadən xəbər verir ki, bu barədə “Orda.kz” portalı məlumat yayıb.
Sözügedən şirkət əməkdaşı Abay Orgençbayev elektrik xətləri üçün dayaqlar quraşdırırmış. O, günorta saat 11:00 radələrində, qəzadan yarım saat əvvəl səmada güclü uğultu eşidib. Təyyarə uzun müddət eniş edə bilməyib, sanki idarəetməni itirib.
“Təyyarə üzərimizdən hava limanına doğru uçdu. Amma nədənsə ora enə bilmədi və yenidən bizim üstümüzdən uçaraq Saina Şapaqatov kəndinə tərəf getdi. Düşündüm ki, təyyarə hansısa manevr edir. O, çox qeyri-adi şəkildə uçurdu. Sanki o, idarəetməni itirmişdi. 43-cü kilometrdə qəflətən düşməyə başladı, lakin yerə təxminən 100 metr qalmış yenidən qalxdı. Daha sonra təyyarə dənizə tərəf döndü. Qısa müddətdən sonra o, KCOI müəssisəsinə doğru uçdu və onun yaxınlığında yerə endi. Yerə dəydikdən sonra partladı. Bütün bunlar gözümüzün qabağında baş verdi. Partlayış zamanı təyyarənin bir hissəsi qopdu”, – Orgençbayev qeyd edib.
Hadisə şahidi deyir ki, təyyarə təxminən 10 dəqiqə yerə enməyə çalışıb:
“Pilotlar hündürlüyü qoruyub saxlamağa və yaşayış binaları ilə toqquşmadan qaçmağa müvəffəq oldular”.
Təyyarə qəzaya uğrayan zaman işçilər dərhal qəza yerinə qaçıblar:
“Yaxınlaşanda təyyarənin quyruq hissəsindən insanların çıxdığını gördüm. Onlar şok vəziyyətdə idilər, səndələdilər, güclə yeriyə bilirdilər. Bəziləri oturmuşdu, çoxları ətrafda baş verənləri anlamaqda çətinlik çəkirdi. İçəridə kömək üçün qışqırıqlar eşitdik və onları çıxarmağa tələsdik. Üç oğlan dərhal içəri girdi, digərləri çöldə qaldı və insanları kabinədən çıxarmağa kömək etdilər”.
Orgençbayevin həmkarı Kadırbek Toylıbay bildirib ki, ən çətini quyruq hissəsində sıxışan sərnişinləri xilas etmək olub:
“Onları çıxarmaq üçün yük maşını lazım idi. İlk olaraq stüardessanı çıxardıq. Sonra uşaqlarla mən içəri girdik və yaralıları daşımağa başladıq. Onlardan biri, əlində qan izi olan kişi də bizə kömək etdi. Ən ağır xəsarətləri arxa hissədə olan dörd sərnişin alıb. Onlar ağrıdan qışqırır, “ayağım” sözünü təkrarlayır və kömək üçün yalvarırdılar. İlk təcili yardım KCOI müəssisəsindən gəldi. Oranın həkimləri ilk on qurbanı apardılar. Sonra xəstəxanalardan həkimlər, ardınca yanğınsöndürənlər gəldi. Dərhal təyyarənin sınmış və yanan yarısını söndürməyə başladılar”.
Şahidlərin dediyinə görə, təyyarədən çıxardıqları sərnişinlərin hamısı təhlükəsizlik kəməri taxıb:
“Salonun ətrafına maskalar səpələnmişdi. İçəridən qan və kerosin iyi gəlirdi. Təyyarə dənizə düşsəydi, insanları xilas edə bilməzdik. Sanki Allah özü kömək etdi”.
Qazaxıstanın “Air Astana” aviaşirkətinin əməkdaşı da təcili enişin şahidi olub. Mədinə Yerpanova təfərrüatı sosial şəbəkədə paylaşıb:
“İlk dəfə və ümid edirəm sonuncu dəfə təyyarə qəzasının şahidi oldum. Bu gün mən həmişəki kimi növbədə idim. Qəfildən həmkarlar AZAL-ın idarə heyətinin məcburi eniş etdiyini bildirdilər. Biri dedi ki, oksigen balonu partladı, biri dedi ki, şassi çıxmır, mühərrik tüstülənir. Gördüm ki, bütün xidmətlər platformaya toplaşıb: yanğınsöndürənlər artıq uçuş-enmə zolağında dayanıblar. Həmin an atmosfer həddindən artıq gərgin idi. Hava limanının əməkdaşları təyyarənin hər bir hərəkətini diqqətlə izləyirdi. Biz onun uçduğunu gördük. O, xaotik uçurdu. Hamının gözü yaşlı idi. Bir anda təyyarə gözdən itdi. Kimsə qışqırırdı”.
Qeyd edək ki, 25 dekabrda Bakı-Qroznı reysini həyata keçirən AZAL təyyarəsi Qroznı səmasında Rusiya HHM sistemləri tərəfindən vurulub və ciddi zədə alıb. Enişinə icazə verilmədiyindən Aktauya istiqamət götürən təyyarə Aktau hava limanı yaxınlığında qəzaya uğrayıb. Qəza nəticəsində göyərtədə olan 67 nəfərdən 38-i həlak olub, 29 nəfər sağ qalıb.
